وزیراعظم شہبازشریف سے پاکستان میں متعین چین اورقطرکے سفراء کی ملاقات ہوئی جس میں باہمی دلچسپی کے امور اور دو طرفہ تعلقات پر تبادلہ خیال کیا گیا۔

پاکستان میں تعینات چین کے سفیر نے شہباز شریف سے ملاقات کی، اس دوران وزیراعظم نے اپنے حالیہ دورہ چین کے حوالے سے گفتگو کرتے ہوئے کہا کہ دورے سے پاک، چین دوستی مزید مضبوط ہوئی اور دونوں ممالک کے درمیان اسٹریٹجک پارٹنر شپ میں بھی اضافہ ہوا ہے۔

وزیراعظم نے چین کے سابق صدر جیانگ زیمن کے انتقال پر گہرے دکھ کا اظہار کرتے ہوئے کہا کہ وہ قابل اعتماد دوست تھے، ان کی کمی شدت سے محسوس کی جائے گی۔

دوسری جانب شہباز شریف سے قطر کے سفیر نے بھی ملاقات کی اور اپنی قیادت کی جانب سے فیفا ورلڈ کپ کی سکیورٹی کے لئے مدد پر نیک خواہشات کا پیغام پہنچایا۔

وزیراعظم نے قطری قیادت کے پیغام پر خوشی کا اظہار کیا اور فیفا ورلڈ کپ 2022 کی میزبانی پر مبارکباد دی، اس موقع پر شہباز شریف نےکہا کہ پاکستان اور قطر کے درمیان قریبی اور خوشگوار برادرانہ تعلقات ہیں۔