پاکستان تحریک انصاف کے رہنما حماد اظہر کا کہنا ہے کہ ملک کی 80 فیصد انڈسٹریز بند ہیں، اوپن مارکیٹ میں ڈالر 250 سے اوپر چلا گیا ہے۔

اسلام آباد میں پریس کانفرنس کرتے ہوئے حماد اظہر نے کہا کہ سردیوں میں بجلی کا استعمال کم ہوجاتا ہے، کم استعمال کے باوجود عوام کو بجلی دستیاب نہیں۔

ان کا کہنا تھا کہ سردیوں میں توانائی کا اتنا برا بحران پہلے کبھی نہیں آیا، پاکستانی معیشت کی صورتحال مسلسل خراب ہو رہی ہے، ٹیکنوکریٹ حکومت سے متعلق شوشے چھوڑے جارہے ہیں، یہ لوگ جمہوری طریقے سے مسلط نہیں ہوئے۔

انہوں نے کہا کہ پی ڈی ایم حکومت کی ناکامی جمہوریت کی ناکامی نہیں، موجودہ حکومت ملک کیلئے سنجیدہ منصوبہ بندی نہیں کر رہی، پی ڈی ایم والوں کے بیرون ملک اربوں کے اثاثے ہیں، پی ڈی ایم والوں کےبیرون ملک اربوں کے اثاثے ہیں۔

پی ٹی آئی رہنما نے کہا کہ ان لوگوں کوملک کا کوئی غم نہیں، مزید کوئی تجربہ ملک کومزید انارکی طرف لے جائے گا، پی ڈی ایم حکومت بلدیاتی انتخابات بھی بھاگ رہی ہے۔

ان کا مزید کہنا تھا کہ اب پولیٹیکل انجینئرنگ سےکسی کوفائدہ نہیں ہوگا، گزشتہ8ماہ سے ہونے والی سازشوں سے واقف ہیں، عمران خان کی جدوجہد مثالی ہے، اب تک ہونے والے تمام سروے عمران خان کے حق میں آئے۔