وزیراعظم شہباز شریف اور آرمی چیف جنرل عاصم منیر نے نماز عید فوجی جوانوں کے ساتھ ادا کی جبکہ مختلف سیاسی رہنماؤں نے نماز عید اپنے آبائی علاقوں میں ادا کی۔

وزیر اعظم نے پاک افغان بارڈر پر فوجی جوانوں کے ساتھ عید کی نماز ادا کی۔ شہباز شریف کے ہمراہ آرمی چیف جنرل عاصم منیر، وفاقی وزرا اسحاق ڈار اور خواجہ آصف بھی موجود تھے، انھوں نے بھی سیکیورٹی فورسز کے ساتھ نماز عید ادا کی۔

سابق صدر آصف علی زرداری نے آبائی علاقے نواب شاہ اور وزیرِ خارجہ بلاول بھٹو زرداری نے لاڑکانہ میں نماز عید ادا فرمائی۔

حکومتی اتحاد ( پی ڈی ایم) کے سربراہ مولانا فضل الرحمٰن نے آبائی گاؤں عبد الخیل (ڈیرہ اسماعیل خان) میں نمازِ عید ادا کی جبکہ نواز شریف نے فیملی کے دیگر ارکان کے ہمراہ گزشتہ روز ایمریٹس ہل دبئی میں عید الاضحیٰ کی نماز ادا کی تھی۔

گورنر سندھ کامران ٹیسوری، ایم کیو ایم پاکستان کے سربراہ خالد مقبول صدیقی، میئر کراچی مرتضی وہاب اور سلمان مراد نے باغ جناح پولو گراؤنڈ میں نمازِ عید ادا کی جبکہ وزیرِ اعلیٰ سندھ مراد علی شاہ اہل خانہ کے ساتھ امریکا میں ہیں۔

گورنر پنجاب بلیغ الرحمان نے لاہور میں نماز عید ادا کی جبکہ گورنر بلوچستان ملک عبدالولی خان کاکڑ، چیف جسٹس بلوچستان ہائیکورٹ جسٹس نعیم اختر اور دیگر اعلیٰ حکام نے نماز عید گورنر ہاؤس میں ادا کی۔

پاکستان تحریک انصاف کے وائس چیئرمین شاہ محمود قریشی اور پیپلزپارٹی کے رہنما یوسف رضا گیلانی نے ملتان، خورشید شاہ نے سکھر جبکہ امیر جماعت اسلامی سراج الحق نے لاہور میں نماز عید ادا فرمائی۔

وزیراعظم آزاد کشمیر چوہدری انوار الحق نے بھمبر میں اور سابق وزیراعظم راجہ فاروق حیدر خان نے مظفرآباد کی مرکزی عید گاہ میں نماز عید ادا کی ۔