کراچی میں نارتھ ناظم آباد میٹرک بورڈ کے قریب تیز رفتار کار گرین لائن کے جنگلے سے ٹکرانے کے بعد الٹ گئی۔

بورڈ آفس کے قریب حادثہ صبح سویرے پیش آیا جہاں تیز رفتار کار گرین لائن بس کی گرل سے ٹکرا گئی۔

گرین لائن بس کی گرل سے ٹکرانے کے بعد کار الٹ گئی، جس کے نتیجے میں گرل اور دیوار کا ملبہ ٹریک پر آگیا۔

متعلقہ حکام نے ٹریک سے ملبہ ہٹانے کے بعد گرین لائن بس کا راستہ صاف کر دیا، خوش قسمتی سے حادثے میں کوئی جانی نقصان نہیں ہوا، کار میں موجود تمام افراد محفوظ رہے تاہم کار میں سوار دو افراد زخمی ہوئے، جنہیں اسپتال منتقل کیا گیا۔

یہ پہلا موقع نہیں جب گرین لائن کے پاس کوئی حادثہ پیش آیا ہو، فروری میں ناگن چورنگی کے قریب گرین لائن بس کو حادثہ پیش آیا تھا، مسافر بس جنگلے سے ٹکرا گئی تھی جس کے باعث ڈرائیور اور خواتین سمیت متعدد افراد زخمی ہوگئے تھے۔