پاکستان کرکٹ بورڈ (پی سی بی) کی مینجمنٹ کمیٹی کے چیئرمین ذکا اشرف نے فخر زمان سے ٹیلیفون پر گفتگو کی ہے اور ان کیلئے دس لاکھ روپے انعام کا اعلان کیا ہے۔

ذکا اشرف نے فخر زمان کی آج کی 126 رنز کی ناقابل شکست اننگز کو سراہا۔ شاندار پرفارمنس پر ان کیلئے دس لاکھ روپے انعام کا اعلان کیا۔

ذکا اشرف نے کہا کہ مجھے امید ہے آپ آئندہ میچوں میں بھی اچھی کارکردگی کا مظاہرہ کریں گے۔

قبل ازیں نیوزی لینڈ کے خلاف تاریخی فتح کے بعد اوپنر فخر زمان کو مین آف دی میچ کا ایوارڈ دیا گیا۔

میچ کے بعد گفتگو کرتے ہوئے فخر زمان نے کہا کہ ہر گیم ہمارے لیے ڈو اور ڈائی والی ہے، پلان کے مطابق بیٹنگ کی، آج میرا لکی دن تھا۔

خیال رہے کہ فخر زمان نے نیوزی لینڈ کے خلاف 126 رنز کی شاندار اننگز کھیلی ہے جس میں 11 چھکے اور 8 چوکے شامل ہیں۔فخر کی بہترین بیٹنگ کی بدولت پاکستان نے نیوزی لینڈ کو 21 رنز سے ہرا دیا ہے۔