آرٹس کونسل آف پاکستان کراچی میں آج سے 4 روزہ 16 ویں بین الاقوامی اردو کانفرنس کا آغاز آج سے ہورہا ہے۔ نگراں وزیراعلیٰ سندھ جسٹس (ر) مقبول باقر افتتاح کریں گے۔

اردو کانفرنس میں دنیا بھر کے 200 سے زائد دانشور شرکت کریں گے۔

اس سال سب سے بڑی کشش مشہور شاعر گلزار اور بھارتی اسکرین رائٹر جاوید صدیقی کی آن لائن شرکت ہوگی۔

صدر آرٹس کونسل احمد شاہ نے اس حوالے سے کی جانے والی پریس کانفرنس میں کہا کہ گزشتہ 16 سال سے لوگ اس تقریب کا بے صبری سے انتظار کرتے ہیں کیونکہ اس کا آغاز اس وقت ہوا تھا جب نفرت کے کلچر نے شہر کا محاصرہ کیا ہوا تھا۔

انہوں نے انتقال کر جانے والے بہت سے مصنفین اور معروف شخصیات کو یاد کرتے ہوئے کہا کہ رواں سال کا ایڈیشن ان لوگوں کے لیے وقف کیا جائے گا جنہوں نے ادب کی دنیا میں اپنا کردار ادا کیا۔

احمد شاہ نے مزید کہا کہ اردو کانفرنس میں ایک سیشن جوش ملیح آبادی پر رکھا گیا ہے جس میں ان پر بنائی گئی دستاویزی فلم اور ہندوستانی شاعر اور فلم ساز گلزار کے ساتھ گفتگو پر توجہ مرکوز کی جائے گی۔

عالمی اردو کانفرنس 3 دسمبر تک جاری رہے گی۔