اسلام آباد کے تھانہ رمنہ کی حدود میں فائرنگ سے پولیس اہلکار اور اس کا بیٹا جاں بحق ہوگیا، جبکہ ملزمان فرار ہونے میں کامیاب ہوگئے۔

پولیس کے مطابق میں ہیڈ کانسٹیبل محمد اشرف ڈیوٹی ختم کرکے بیٹے کے ہمراہ گھر جا رہا تھا کہ اس نے راہزنوں کو ڈکیتی کرتے پایا۔

سی سی ٹی وی فوٹیج کے مطابق مسلح ملزمان کو ڈکیتی کرتے دیکھ کر اہلکار اشرف نے ان کی جانب دوڑ لگا دی، اہلکار کو دیکھ کر ملزمان فرار ہونے کی کوشش کرنے لگے، پولیس اہلکار نے ملزمان کو دبوچا تو اس کا بیٹا بھی مدد کو آگیا۔

دونوں کو اپنے اوپر حاوی ہوتا دیکھ کر ملزمان نے فائرنگ کی۔

فائرنگ کی زد میں کانسٹیبل اشرف کا بیٹا ذیشان بھی آگیا۔

فائرنگ کرنے کے بعد راہزن فرار ہوگئے۔

ہیڈ کانسٹیبل اشرف پولیس لائن ہیڈ کواٹرز میں تعینات تھا۔

سی سی پی او ڈاکٹر اکبر ناصر نے نوٹس لیتے ہوئے ملزمان کو جلد گرفتار کرنے کے احکامات جاری کردیے ہیں۔