پاکستان اور بھارت کا آئندہ برس امریکا اور ویسٹ انڈیز میں ہونے والے ٹی ٹوئنٹی ورلڈ کپ 2024 کے گروپ مرحلے میں ٹکرائے جانے کا امکان ہے۔

برطانوی اخبار ٹیلی گراف کے مطابق ورلڈ کپ 2024 کا پاک بھارت ٹکارا نیو یارک میں کھیلا جائے گا، امریکا جون میں ویسٹ انڈیز کے ساتھ ٹی 20 ورلڈ کپ کی مشترکہ میزبانی کر رہا ہے جس میں پاک بھارت ایک ہی گروپ میں شامل ہوں گے۔

یہ میچ نیو یارک کے مضافات میں واقع پاپ اپ اسٹیڈیم میں 9 جون کو کھیلا جائے گا۔ نیو یارک میں ٹورنامنٹ کے لیے 34 ہزار نشستوں پر مشتمل عارضی اسٹیڈیم تعمیر کیا جائے گا۔

نیو یارک میں میچ اس لیے کھیلے جانے کی اطلاعات ہیں کیونکہ اعداد و شمار سے معلوم ہوا ہے کہ شہر میں تقریبا 7 لاکھ 11 ہزار بھارتی اور ایک لاکھ پاکستانی شہری مقیم ہیں۔

رپورٹس میں بتایا گیا کہ ٹی ٹوئنٹی ورلڈ کپ 2024 کے لیے امریکا میں صرف تین مقامات استعمال کیے جائیں گے اور ان میں فلوریڈا میں انٹرل برورڈ پارک، ٹیکساس کا گرینڈ پریری اسٹیڈیم اور مین ہٹن سے تقریبا 25 میل دور لانگ آئی لینڈ پر آئزن ہاور پارک شامل ہیں۔

جون میں ہونے والے ٹی 20 ورلڈ کپ کے گروپ مرحلے میں ون ڈے ورلڈ کپ چیمپیئن آسٹریلیا اور ٹی ٹوئنٹی ورلڈ چیمپیئن انگلینڈ کی ٹیمیں بھی ٹکرائٰیں گی۔ اس سے قبل 2010 میں انگلینڈ نے آسٹریلیا کو شکست دے کر ٹی 20 ورلڈ کپ جیتا تھا۔

واضح رہے کہ 9واں ٹی ٹوئنٹی ورلڈ کپ امریکا اور ویسٹ انڈیز میں 4 سے 30 جون 2024 تک کھئیلا جائے گا۔