Aaj News

اتوار, جولائ 14, 2024  
08 Muharram 1446  

آئندہ ماہ سے آٹا، دال، چاول، چینی اور مصالحوں پر 18 فیصد سیلز ٹیکس عائد ہوگا، چیئرمین ایف بی آر

کھلی اشیا پر اضافی ٹیکس نہیں لگایا گیا، فارمولہ دودھ پرعائد کردہ 8 فیصد جی ایس ٹی میں کمی کی سفارش کی ہے، امجد زبیر ٹوانہ
اپ ڈیٹ 15 جون 2024 08:50pm

چیئرمین ایف بی آر امجد زبیر ٹوانہ نے سینیٹ کی قائمہ کمیٹی برائے خزانہ کے اجلاس میں بتایا کہ آئندہ مالی سال سے پروسسنگ اور پیکڈ آٹا، دال، چاول، چینی اور مصالحوں پر 18 فیصد سیلز ٹیکس عائد ہوگا۔

چیئرمین کمیٹی سلیم مانڈوی والاکی زیرصدارت سینیٹ کی قائمہ کمیٹی کا اجلاس ہوا جس میں چیئرمین ایف بی آر اور نمائندہ انڈسٹری شیخ وقار احمد نے شرکت کی۔

وفاقی بجٹ: سرکاری ملازمین کی تنخواہوں میں کتنا اضافہ ہوگا

چیئرمین ایف بی آر امجد زبیر ٹوانہ نے کہا کہ 18 فیصد جی ایس ٹی تمام پیکنگ والی اشیا پرلگایا گیا، کھلی اشیاپراضافی ٹیکس نہیں لگایا گیا، فارمولہ دودھ پرعائد کردہ 8 فیصد جی ایس ٹی میں کمی کی سفارش کی ہے۔

چیئرمین ایف نے قائمہ کمیٹی کو بتایا کہ 18 فیصد جی ایس ٹی لوکل پراسسڈ دودھ پرلگایا گیا، یہ فارمولہ دودھ غریب مائیں بچوں کیلئے استعمال نہیں کرتیں۔

امجد زبیرٹوانہ نے کہا کہ گاؤں میں کبھی غریب بندے کوبچوں کیلئے مہنگا فارمولہ دودھ خریدتے نہیں دیکھا، یہ دودہ فروخت کرنے والی کمپنی کے ڈیلرزاورڈسٹری بیوٙٹرزبھی غیر رحسٹرڈ ہیں۔

18877 ارب روپے کا 8500 ارب خسارے کا بجٹ پیش، حکومت 12970 ارب کے ٹیکس جمع کرے گی

سینیٹرفاروق نائیک نے کہا کہ اس کمپنی کو ٹیکس چوری پر بلیک لسٹ کردیں، سیلزٹیکس ان ڈائریکٹ ٹیکس ہے جوصارف کو ادا کرنا پڑتا ہے۔

سلیم مانڈوی والا نے کہا کہ ملک میں خواتین کی اکثریت بچوں کیلئے فارمولہ دودھ استعمال کرتی ہے، ڈبہ پیکڈ دودھ تیارکرنے والی کمپنی تین چار سال سے قیمتیں بڑھا رہی ہے، کمپنی اگرڈبہ دودھ کی قیمت کم کرے تو ہم ٹیکس میں کمی پر غور کریں گے۔

چیئرمین ایف بی آر نے کہا کہ 600 روپے قیمت پر18 فیصد جی ایس ٹی کے حساب سے قیمت میں کمی کی جائے، ایف بی آر اسی حساب سے ٹیکس میں کمی پر غور کرے گا۔

قائمہ کمیٹی خزانہ نے فارمولہ دودھ پرعائد کردہ 18 فیصد جی ایس ٹی میں کمی کی سفارش کردی۔

FBR

Budget 2024 25