ہیئر ڈریسر کے پاس جانا اکثر ایک آرام دہ اور اپنی کیئر کے لیے بہترین سمجھا جاتا ہے، لیکن ’بیوٹی پارلر اسٹروک سنڈروم‘ (BPSS) نامی ایک حالت کے باعث یہ عمل صحت کے لیے سنگین خطرہ بن سکتا ہے۔ بال دھونے کے دوران گردن کی غیر معمولی پوزیشن فالج جیسی علامات پیدا کر سکتی ہے، جسے نظر انداز نہیں کیا جانا چاہیے۔

بیوٹی پارلر اسٹروک سنڈروم کیا ہے؟

یہ حالت پہلی بار 1993 میں امریکی نیورولوجسٹ مائیکل وینٹراب نے دریافت کی تھی۔ انہوں نے ایسے مریضوں کو دیکھا جنہیں بال دھونے کے بعد گردن کی شریانوں پر دباؤ کی وجہ سے فالج جیسی علامات کا سامنا ہوا۔ عام طور پر سیلونز میں استعمال ہونے والے بیک واش بیسنز پر گاہکوں کو عجیب زاویے پر بٹھایا جاتا ہے، جو گردن میں چوٹ اور دماغ کو خون پہنچانے والی شریانوں کو متاثر کر سکتا ہے۔

فالج کے خطرات

فالج دماغ میں خون کے بہاؤ میں کمی کی وجہ سے ہوتا ہے، جو آکسیجن اور غذائی اجزاء کی کمی کا باعث بنتا ہے۔ بیوٹی پارلر اسٹروک سنڈروم میں، گردن کو غیر معمولی زاویے پر رکھنے یا جھٹکے کی حرکت کے باعث گردن کی شریانوں پر دباؤ بڑھتا ہے، جو ان کے پھٹنے یا سکڑنے کا سبب بن سکتا ہے۔ اس کے نتیجے میں دماغ کو پہنچنے والا خون محدود ہو جاتا ہے، جو فالج جیسی علامات پیدا کر سکتا ہے۔

کچے آلو، سبزی ہی نہیں بیوٹی ایکسپرٹ بھی ہیں

خطرے کے عوامل

بیوٹی پارلر اسٹروک سنڈروم کے امکانات زیادہ تر 50 سال سے زیادہ عمر کی خواتین میں ہوتے ہیں، خاص طور پر وہ افراد جو ہائی بلڈ پریشر، ذیابیطس یا ہائی کولیسٹرول جیسی بیماریوں میں مبتلا ہوں۔ گردن کی ریڑھ کی ہڈی کے مسائل یا شریانوں کی تنگی بھی اس خطرے کو بڑھا سکتی ہیں۔ تاہم، یہ حالت نوجوانوں اور صحت مند افراد کو بھی متاثر کر سکتی ہے۔

اس مسئلے سے متاثرہ حالت کی علامات میں سر درد، چکر آنا، دھندلا نظر آنا، گردن میں درد، متلی، جسم کے ایک طرف کمزوری یا فالج کا اثر، اور بعض اوقات ہوش میں کمی شامل ہیں۔

بعض اوقات یہ علامات فوری ظاہر نہیں ہوتیں بلکہ تاخیر سے محسوس ہوتی ہیں، جس کی وجہ سے تشخیص مشکل ہو جاتی ہے۔

احتیاطی تدابیر

اگر آپ بیوٹی پارلر اسٹروک سنڈروم کے خطرے سے بچنا چاہتے ہیں تو بال دھونے کے دوران درج ذیل اقدامات اپنائیں:

گردن کے نیچے کوئی نرم سہارا رکھیں تاکہ زاویہ درست ہو۔

سر کو سنک کے کنارے پر پیچھے لٹکانے کے بجائے سنک کے اوپر جھکنے کو کہیں۔

شیمپو کے دوران ہلکی اور نرم حرکت کو ترجیح دیں۔

بیک واش سنک پر کم سے کم وقت گزاریں اوراس دوران کسی بھی قسم کی تکلیف پر فوراً بتائیں ۔

بیگم کے بیوٹی پارلر میں مبینہ بجلی چوری پکڑے جانے پر گلوکار جواد احمد برہم

بال دھونے کا عمل عام طور پر ایک خوشگوار اور محفوظ تجربہ ہوتا ہے، لیکن اس عمل کے دوران احتیاطی تدابیر اختیار کرنا ضروری ہے۔

بیوٹی پارلر اسٹروک سنڈروم ایک غیر معمولی حالت ہے، لیکن اس کے خطرات سے آگاہی اور بروقت اقدام آپ کو صحت کے مسائل سے بچا سکتے ہیں۔ ہمیشہ اپنی گردن کی پوزیشن پر توجہ دیں اور اپنی حفاظت کو ترجیح دیں تاکہ آپ کا سیلون کا تجربہ صحت مند اور خوشگوار رہے۔