کراچی میں گورنمنٹ ڈگری گرلز کالج کے سپرٹینڈنٹ نے لاکھوں روپے کی فیس لیکر فرار ہونے کے بعد زہر پی لیا، جس کے نتیجے میں وہ تشویشناک حالت میں عباسی شہید اسپتال میں زیر علاج ہے۔ پولیس کے مطابق ملزم کو آئی سی یو میں رکھا گیا ہے اور اس کی صحت یابی کے بعد تحقیقات کی جائیں گی۔

پولیس ذرائع کے مطابق ملزم نے 9 لاکھ 10 ہزار روپے سے زائد رقم طالبات کی فیس کی مد میں جمع کی تھی اور بعد میں فرار ہوگیا تھا۔ تاہم، کالج کی پرنسپل نے طالبات کی فیس اپنے پاس سے جمع کروا کر ایڈمٹ کارڈ جاری کر دیے ہیں تاکہ طالبات کا تعلیمی نقصان نہ ہو۔

ملزم کو اسپتال میں حفاظتی تحویل میں رکھا گیا ہے اور پولیس کی ٹیم وہاں تعینات کر دی گئی ہے۔ پولیس نے بتایا کہ ملزم کی صحت یاب ہونے کے بعد اس کے خلاف مزید قانونی کارروائی کی جائے گی۔