مودی کے فالس فلیگ آپریشن کا بڑا ہتھیار اینکر ارناب گوسوامی خود اپنی چالوں میں پھنس گیا۔ بھارت کے متنازع صحافی ارناب گوسوامی کے خلاف جھوٹی خبریں پھیلانے کے الزام میں مقدمہ درج کرلیا گیا۔

بھارتی میڈیا کی رپورٹس کے مطابق بھارتی اینکر ارناب گوسوامی کے ساتھ حکمراں جماعت بی جے پی کے شعبہ آئی ٹی کے سربراہ امیت مالویہ پر بھی مقدمہ درج کیا گیا ہے۔

رپورٹ کے مطابق بھارتی پولیس کا کہنا ہے کہ امیت مالویہ اور ارناب گوسوامی پر جھوٹی خبریں پھیلانے کا مقدمہ انڈین یوتھ کانگریس نے درج کروایا ہے۔

پولیس نے بتایا کہ مدعی کے مطابق امیت مالویہ اور ارنب گوسوامی نے دانستہ طور پر جھوٹی معلومات پھیلانے کی مجرمانہ منصوبہ بندی کی۔

امریکی پروفیسر ارناب گوسوامی کے ٹاک شو سے اٹھ کر چلی گئیں، اہم وجہ بتا دی

رپورٹ کے مطابق ترکیے کے خلاف نفرت انگیز مہم کے دوران ارناب گوسوامی نے پروپیگنڈا کیا تھا کہ استنبول میں کانگریس کا دفتر موجود ہے۔

مقدمے میں فساد پھیلانے کے ارادے سے اشتعال انگیزی کی دفعہ شامل کی گئی۔ ایف آئی آر کے متن کے مطابق یہ عمل واضح اور ناقابل انکار مجرمانہ ارادے کے ساتھ کیا گیا تاکہ بھارتی عوام کو دھوکہ دیا جا سکے، ایک بڑی سیاسی جماعت کی بدنامی کی جا سکے، قومی جذبات کو بھڑکایا جا سکے، اور قومی سلامتی کو خطرے میں ڈالا جا سکے۔