شہر قائد میں آج گرج چمک کے ساتھ ہلکی سے درمیانی شدت کی بارش کا امکان ظاہر کیا گیا ہے۔ محکمہ موسمیات کے مطابق یہ بارشیں پری مون سون سسٹم کا حصہ ہیں، جس کے تحت گزشتہ روز بھی شہر کے مختلف علاقوں میں ہلکی بارش ہوئی تھی۔

محکمہ موسمیات کا کہنا ہے کہ آئندہ 24 گھنٹوں کے دوران موسم گرم اور مرطوب رہنے کا امکان ہے، جبکہ سمندری ہوائیں 10 سے 20 کلومیٹر فی گھنٹہ کی رفتار سے چلیں گی۔

ہوا میں نمی کا تناسب 50 سے 80 فیصد تک رہنے کا امکان ہے جبکہ نمی کے باعث درجہ حرارت 6 سے 9 ڈگری سینٹی گریڈ زائد محسوس کیا جا رہا ہے۔

ملک بھر میں بارش اور کہیں آندھی کا امکان

محکمہ موسمیات کے مطابق آج زیادہ سے زیادہ درجہ حرارت 37 سے 39 ڈگری سینٹی گریڈ رہنے کی توقع ہے جبکہ کم سے کم درجہ حرارت 30 ڈگری سینٹی گریڈ ریکارڈ کیا گیا۔

محکمہ موسمیات نے شہریوں کو گرمی اور حبس سے بچاؤ کے لیے احتیاطی تدابیر اختیار کرنے کی ہدایت کی ہے۔ بارش کے باعث کچھ علاقوں میں سڑکوں پر پھسلن اور ٹریفک کی روانی متاثر ہونے کا خدشہ بھی ظاہر کیا جا رہا ہے۔