وزیراعلٰی پنجاب عثمان بزدار نے لیگی رہنما ایازصادق کے بیان پر سخت ردعمل کا اظہار کیا اور کہا، ایاز صادق سمیت بعض اپوزیشن رہنما ملک دشمنی کی حد پارکرچکے ہیں، ملک دشمن بیانیے کی پاکستان میں رتی بھر گنجائش نہیں ہے۔

لاہور سے جاری ایک بیان میں وزیراعلٰی پنجاب عثمان بزدار نے کہا ہے کہ ایاز صادق اوربعض اپوزیشن رہنماؤں کے بیانات ناقابل فہم اورقومی مفادات کے یکسر منافی ہیں۔

وزیراعلیٰ پنجاب عثمان بزدار کا کہنا تھا کہ ایسے بیانات ملک دشمن کے بیانیے کے عکاس ہیں۔پاکستان کے عوام شر انگیز بیانیے کو مکمل مسترد کرتے ہیں۔

ان کاکہنا تھا کہ غیر ملکی آقاؤں کے اشارے پر اداروں کو متنازعہ بنانے کی کوشش پاکستان کو نقصان پہنچانے کے مترادف ہے۔

انہوں نے مزید کہا کہ ملک دشمن کا ایجنڈا پاکستان میں نہ پہلے چلا ہے نہ آئندہ چلنے دیا جائے گا۔ایسے مذموم بیانیے کو پروان چڑھانے والے عناصر کے عزائم قوم جان چکی ہے۔

انہوں نے مزید کہا کہ 22کروڑ عوام مسلح افواج کے ساتھ سیسہ پلائی دیوار کی طرح کھڑے ہیں۔