اسلام آباد: وفاقی دارالحکومت اسلام آباد میں تیز رفتار کار پیٹرول پمپ کے بورڈ سے ٹکرا گئی، حادثے میں 4 افراد جاں بحق ہوگئے۔

افسوسناک حادثہ وفاقی دارالحکومت کے نواحی علاقے بارہ کہو میں پیش آیا، جہاں تیز رفتار کار بے قابو ہوکر پیٹرول پمپ سے ٹکراگئی، دلخراش حادثے کے نتیجے میں 4 نوجوان جاں بحق جبکہ دو شدید زخمی ہوئے۔

واقعے کی اطلاع ملنے پر ریسکیو ٹیمیں جائے حادثے پر پہنچی اور جاں بحق اور زخمیوں کو پمز اسپتال منتقل کیا، جہاں دونوں شدید زخمیوں کو طبی امداد دی جارہی ہے۔

حادثے میں جاں بحق نوجوانوں کی لاشوں کو گاڑی کاٹ کر نکالا گیا، جاں بحق ہونے والے 3 افراد کی شناخت فرحان، فراز اور حمزہ کے ناموں سے ہوئی ہے۔