وفاقی وزیر اطلاعات مریم اورنگزیب نے کہا ہے کہ عمران خان نے جو کال دی ہے عوام تمہارا راستہ بند کرے گی ، جو قانون کو ہاتھ میں لے گا قانون اس کو ہاتھ میں لے گا۔

اسلام آباد میں پریس کانفرنس کرتے ہوئے مریم اورنگزیب نے کہا کہ ایک شخص 4 سال سےعوام سے جھوٹ بول رہاہے، آج بھی ہم پرالزام تراشی کی گئی۔

انہوں نے کہا کہ 4 سالہ کارکردگی کے بجائے عوام سے جھوٹ بولا گیا، فرح گوگی اور شہزاد اکبر کی کرپشن بنی گالا تک جاتی ہے، لیگی قیادت پر ایک الزام بھی ثابت نہیں ہوسکا۔

وفاقی وزیر اطلاعات نے کہا کہ چور چور کا شور کرنے والوں کی کرپشن کی داستانیں عام ہورہی ہیں، عمران خان نےدوست ممالک کےتحائف بیچ دیئے۔

مریم اورنگزیب کا کہنا تھا کہ جو جو قانون کو ہاتھ میں لے گا، قانون اسے ہاتھ میں لےگا، یہ ریاست ہے کوئی بنانا ری پبلک نہیں ہے۔