Aaj.tv Logo

پاکستان کی جانب سے افغانستان کے زلزلہ متاثرین کیلئے امدادی سامان روانہ

اپ ڈیٹ 23 جون 2022

پاکستان اس مشکل گھڑی میں افغان حکومت اور عوام کے ساتھ ہے

اسلام آباد: پاکستان کی جانب سے افغانستان کے زلزلہ متاثرین کیلئے امدادی سامان روانہ کردیا گیا، این ڈی ایم اے نے امدادی سامان رات کو اسلام آباد سے روانہ کیا۔

ترجمان این ڈی ایم اے کے مطابق وزیراعظم شہبازشریف کی خصوصی ہدایت پر پاکستان کی جانب سے افغان زلزلہ متاثرین کیلئے امدادی سامان افغانستان روانہ کیا گیا، 8 ٹرکوں پر مشتمل امدادی سامان میں رہائشی خیمے، ترپال، کمبل اور ضروری ادویات شامل ہیں۔

نیشنل ڈیزاسٹر مینجمنٹ اتھارٹی ( این ڈی ایم اے )نے امدادی سامان رات کو اسلام آباد سے روانہ کیا۔

ترجمان این ڈی ایم اے کے مطابق پاکستان کی جانب سے غم کی اس مشکل گھڑی میں افغان حکومت اور عوام کو ہر ممکن تعاون کی یقین دہانی کرائی گئی ہے۔

خیبرپختونخوا حکومت کا افغان زلزلہ متاثرین کیلئے میڈیکل ٹیمیں بھجوانے کا فیصلہ

ادھر خیبرپختونخوا حکومت نےافغان زلزلہ متاثرین کیلئے میڈیکل ٹیمیں بارڈر پر بھجوانے کا فیصلہ کرلیا۔

افغانستان کے زلزلہ متاثرین کےعلاج کیلئے خیبرپختونخوا حکومت نےڈاکٹروں سے رضاکارانہ مدد کی اپیل کی ہے۔

صوبائی وزیر صحت تیمور سلیم جھگڑا کا کہنا ہے کہ زخمیوں کی طبی امداد کیلئے میڈیکل ٹیمیں شمالی وزیرستان بھیج رہے ہیں ، سرحدی علاقوں پر بھی ڈاکٹروں کی ٹیم بھجوائی جائے گی، افغان زلزلہ متاثرین کیلئے خیبرپختونخوا ینگ ڈاکٹرز نے رضاکارانہ سروسز کی پیشکش کردی ہیں۔

خیبرپختونخوا کے ینگ ڈاکٹرز کا کہنا ہے کہ ہم اس مشکل گھڑی میں اپنے افغان بھائیوں کے ساتھ ہیں ۔

واضح رہے کہ افغانستان میں گزشہ روز 6.1 شدت کا زلزلہ آیا تھا جس کےنتیجے میں بڑی تباہی ہوئی تھی، تباہ کن زلزلے سے ہلاکتوں کی تعداد ایک ہزار سے زائد ہوگئی اور سینکڑوں افراد زخمی ہیں۔