فیصل آباد میں شادی سے مبینہ انکارپربی ڈی ایس کی طالبہ کے ساتھ انسانیت سوزسلوک کرنے والے مبینہ مرکزی ملزم شیخ دانش سمیت 6 ملزمان کو گرفتار کرلیا۔

سوشل میڈیا پرمتاثرہ لڑکی پرتشدد کی ویڈیوزسامنے آگئیں جن میں اسے بہیمانہ تشدد کا نشانہ بنانے کےعلاوہ جوتیاں چٹوا کرمعافی منگوائی جارہی ہے۔

طالبہ کے اغواء اورتشدد میں ملوث گھریلو ملازمہ سمیت 6 ملزمان کو پولیس نے رات گئے چھاپے مار کر گرفتار کیا تھا۔

پولیس نے گزشتہ رات مرکزی ملزم شیخ دانش کے گھر چھاپے کے دوران شراب کی بوتلیں اور اسلحہ بھی قبضہ میں لیا تھا۔

ذرائع کے مطابق پولیس نے 50 سے زائد ایمپورٹڈ شراب کی بوتلیں، اسلحہ اور موبائل فونز بھی قبضہ میں لیے ہیں۔

گرفتار ملزمان میں شیخ دانش، ماہم، خان محمد، شعیب، فیضان اوراصغر شامل ہیں جنہیں پولیس کی جانب سے آج مقامی عدالت میں پیش کر کے ریمانڈ کی استدعا کرے گی۔

سٹی پولیس آفیسر کے احکامات پر پولیس کا ایکشن
خاتون پر تشدد اور تذلیل کرنے والے ملزمان گرفتار
پولیس نے کاروائی کرتے ہوئے خاتون سمیت چھ ملزمان گرفتار کر لیے
پولیس پارٹی نے جدید ذرائع بروئے کار لاتے ہوئے ملزمان کو گرفتار کیا: سی پی او#OfficialDPRPP pic.twitter.com/h8OIP7P1JS

— Faisalabad Police (@fsdpolice) August 16, 2022

شراب برآمدگی پر ضمانت

شراب برآمدگی کے معاملے پر پولیس کی جانب سے ملزم دانش کو ڈیوٹی مجسٹریٹ کی عدالت میں پیش کیا گیا۔

عدالت نے ملزم کی 50 ہزار روپے کے مچلکے پر ضمانت منظور کرتے ہوئے دوبارہ 31 اگست کو عدالت میں پیش ہونے کا حکم دے دیا۔

ضمانت منظوری کے بعد پولیس ملزم دانش کو فیصل آباد لے گئی۔

ایف آئی آر کا متن

ایف آئی آر کے متن کے مطابق گزشتہ روز شادی سے انکار پر شیخ دانش نے اپنی بیٹی اینا شیخ اور سیکورٹی گارڈ کے ہمراہ سرگودھا روڈ کی رہائشی میڈیکل کی طالبہ کے گھر پر دھاوا بولا اور اسے اغواء کرکے اپنے گھر لے گئے۔

ایف آئی آر کے مطابق طالبہ کو تشدد کا نشانہ بناتے ہوئے سر کے بال اور بھنویں کاٹنے کے علاوہ جوتیاں چاٹتے ہوئے معافی منگوانے پرمجبور کیا گیا اور زیادتی کی کوشش بھی کی۔

پولیس ذرائع کے مطابق گزشتہ رات مرکزی ملزم شیخ دانش کے گھر چھاپے کے دوران پولیس نے 50 سے زائد غیرملکی شراب کی بوتلیں، اسلحہ اور موبائل فونز بھی قبضہ میں لیے ہیں۔ برآمد ہونے والی شراب اور اسلحہ کا مقدمہ بھی درج کیا جارہا ہے، اس حوالے سے ملزمان سے مزید تفتیش کی جارہی ہے۔