آرمی چیف جنرل قمر جاوید باجوہ کے دورے کے موقع پر ہنگری حکومت نے پاکستانی طلباء کے لیے اسکالر شپس کی تعداد 200 سے بڑھا کر 400 کر دی ہیں۔

آرمی چیف کی ہنگری کے وزیر خارجہ سے بوداپست میں ملاقات ہوئی، ہنگری کے وزیر خارجہ نے پاکستان میں سیلاب کی تباہ کاریوں اور نقصانات پر افسوس کا اظہار کیا، جنرل باجوہ نے دوست ممالک کے نیک جذبات اور تعاون پر اظہار تشکر کیا۔

ہنگری نے تجارت، زراعت اور آبی وسائل کی مینجمنٹ ٹیکنالوجی میں تعاون کی پیشکش کی جب کہ اس موقع پر آرمی چیف کا کہنا تھا کہ ہنگری کے تعاون سے ماحولیاتی اثرات پر قابو پانے میں مدد مل سکے گی۔

اس کے علاوہ جنرل باجوہ کی ہنگری کے کمانڈر ڈیفنس فورسز سے بھی ملاقات ہوئی جس میں باہمی اور پیشہ وارانہ دلچسپی کے امور پر تبادلہ خیال کیا گیا۔