معروف ہالی ووڈ اداکار جونی ڈیپ اور ان کی سابق اہلیہ امبر ہرڈ کے درمیان چلنے والے ہتک عزت کے کیس پر بنائی گئی فلم کا ٹریلر جاری کردیا گیا ۔

ہاٹ کیک: جونی/ہرڈ ٹرائل کے نام سے بنائی گئی فلم کے جاری کیے گئے مختصر ٹیزر میں دونوں اداکاروں کے مرکزی کردار دکھائے گئے ہیں۔

مختصر دورانیے کے ٹریلر میں جونی ڈیپ کے کردار میں مارک ہاپکا جب کہ امبر ہرڈ کے کردار میں میگن ڈیوس کو دکھایا گیا ہے۔

ٹریلر کو جاری کرتے ہوئے فلم میں کو 30 ستمبر کو یوٹیوب پر ریلیز کرنے کا اعلان کیا گیا ہے، جہاں شائقین اسے مفت میں دیکھ سکیں گے۔

فلم کی کہانی گے نکولوشی نے لکھی ہے اور اس کی ہدایات سرا لوہمن نے دی ہیں۔

یاد رہے کہ جونی ڈیپ نے مارچ 2019 میں امبر ہرڈ کے خلاف ریاست ورجینیا میں 5 کروڑ امریکی ڈالر کے ہرجانے کا کیس دائر کیا تھا۔

عدالت کی جانب سے جونی ڈیپ اور امبر ہرڈ کے ٹرائل کا فیصلہ رواں برس یکم جون کو سنایا گیا تھا۔

عدالت نے ہتک عزت کے دعوے کے تحت امبر ہرڈ پر ایک کروڑ 50 لاکھ ڈالر جرمانہ عائد کیا تھا جبکہ جونی ڈیپ پر بھی 15 سے 20 لاکھ تک جرمانہ عائد کیا گیا تھا۔