پاکستان کے معروف اداکار ہمایوں سعید برطانوی شاہی خاندان کی زندگی کی تصویر کشی کرنے والے نیٹ فلکس کے بڑے شو دی کراؤن میں اپنے ڈیبیو کے لیے بالکل تیار ہیں۔

ہمایوں سعید اس سریز میں شہزادی ڈیانا کا کردار ادا کرنے والی الزبتھ ڈیبیکی کے مقابل ڈاکٹر حسنات خان کا کردار ادا کرتے نظر آئیں گے۔

ڈاکٹر حسنات خان لیڈی ڈیانا کی زندگی میں وہ آدمی تھے جن سے متعلق کہا جاتا ہے کہ ان پر لیڈی ڈیانا فدا تھیں۔

ہمایوں سعید نے نیٹ فلکس کے دی کراؤن میں اپنے کردار کی پہلی جھلک آج انسٹاگرام پر شیئر کردی ۔

زیادی تر لوگوں کو یہی ماننا ہے ک ہمایوں سعید یقینی طور پر اس کردار میں فٹ ہوتے ہیں کیونکہ ڈاکٹر حسنات انہیں کی طرح نظر آتے تھے۔

ہمایوں سعید نے ورائٹی سے بات کرتے ہوئے انکشاف کیا کہ وہ پہلی بار کسی حقیقی زندگی کا کردار ادا کر رہے ہیں۔

ہمایوں سعید کا کہنا تھا کہ ڈاکٹر حسنات خان اور شہزادی ڈیانا بالکل مختلف تھے وہ ہر لحاظ سے ایک بہت عام آدمی تھے اور مجھے لگتا ہے کہ اسی چیز نے شہزادی ڈیانا کو اپنی طرف متوجہ کیا۔ ان کی طبیعت اور سادگی نے انہیں شہزادی ڈیانا کے لیے خاص بنا دیا۔

انہوں نے مزید کہا کہ میں نے اسکرین پر حقیقی زندگی کا کوئی کردار ادا نہیں کیا اور ڈاکٹر حسنات خان کا کردار ادا کرنا جنہیں شہزادی ڈیانا کی وجہ سے سب جانتے ہیں بہت بڑی ذمہ داری تھی۔

انہوں نے کہا کہ مجھے یقین ہے کہ اسکرین پر شائقین اس کردار کو پسند کریں گے۔

دی کراؤن سیریز کے سیزن 5 کا آغاز 9 نومبر 2022 کو نیٹ فلکس پر ہوگا۔

شو کے نئے سیزن میں 1990 اور 2000 کی دہائیوں کے دوران شاہی خاندان کے افراد کی زندگی دکھائی جائے گی۔

یاد رہے کہ سیریز کا چوتھا سیزن گزشتہ برس نومبر میں ریلیز کیا گیا تھا، مذکورہ سیریز کا پہلا سیزن 2016 میں جاری کیا گیا تھا، پہلے سیزن میں 1947 سے 1955 کے شاہی خاندان کا دور دکھایا گیا تھا۔

دوسرا سیزن 2017 میں ریلیز کیا گیا تھا جس کی کہانی 1956 سے 1964 کے عرصے کے دوران گھومتی ہے۔

تیسرا سیزن نومبر 2019 میں ریلیز ہوا اور اس میں 1964 سے 1977 کا دور دکھایا گیا تھا۔

سیریز کا چوتھا سیزن نومبر 2020 میں ریلیز ہوا، جس میں 1977 سے لے کر 1986 یا 1988 تک کا دور دکھایا گیا۔