پی ٹی آئی رہنما شیریں مزاری نے نئے آرمی چیف جنرل عاصم منیر کی وزیراعظم شہبازشریف سے ملاقات کی ویڈیو شیئرکرتے ہوئے شہبازشریف کو طنز کا نشانہ بنا ڈالا۔

گزشتہ روز وزیراعظم سے نئے آرمی چیف جنرل عاصم منیر اورچیئرمین جوائنٹ چیفس آف اسٹاف کمیٹی ساحرشمشاد مرزا نے الگ الگ ملاقاتیں کیں تھیں۔

اس ملاقات کی جاری کردہ ویڈیو شیئرکرتے ہوئے شیریں مزاری نے لکھا کہ، ”حتیٰ کہ چیزیں بدلتی ہیں توبھی کچھ بھی نہیں بدلتا۔“

شیرین مزاری کا نشانہ ویڈیو میں جرنل عاصم منیر کی وزیراعظم آفس میں آمد پرشہبازشریف کاان کے خیرمقدم کیلئے آگے بڑھتے ہوئے ہاتھ ملانا تھا، اس دوران نئے آرمی چیف رُک کر وزیراعظم کو سیلوٹ کررہے تھے۔

پی ٹی آئی رہنما نےشہباز شریف کے اس اقدام پر معترض ہوتے ہوئے لکھا کہ ،”امپورٹڈ کرائم منسٹر کے پاس وزیراعظم کے عہدے کے وقارکا کوئی تصور نہیں۔“

شیرین مزاری کے مطابق پروٹوکول کے تحت ضرور بتانا چاہیے کہ نئے آرمی وزیراعظم کے پاس گئے اورسیلوٹ کیا لیکن یہاں وزیراعظم ان سے ملنے کے لیے آگے بڑھے اورانہیں سلام بھی کیا۔