ترکیہ میں آنے والے تباہ کن زلزلے میں اسلامی فتوحات پر مبنی مقبول سیریز ’کورولش عثمان‘ کے اداکار اہلیہ سمیت چل بسے۔

اداکار جاگدس جانکایا اورانکی اہلیہ زلان ٹگرس کے جاں بحق ہونے کی خبرگزشتہ روز سامنے آئی ہے۔

پروڈکشن کمپنی بوزداغ فلم نے آفیشل انسٹا اکاؤنٹ پرجاگدس اوراہلیہ زلان کی زلزلے کے نتیجے میں جان سے جانے کی تصدیق کی۔ اداکار کی اہلیہ پیشے کے اعتبار سے موسیقارتھیں۔

دونوں کی تصویر شیئرکرتے ہوئے پوسٹ کے کیپشن میں فالوورز کو افسوسناک خبرکی اطلاع دیتے ہوئے ان کی مغفرت کیلئے دُعا کی درخواست کی گئی ہے۔

تُرک سیریز ’کورولش عثمان‘ میں جاگدس جانکایا نے قونیہ محل کے اہم سپاہی کا کردار نبھایا تھا۔

واضح رہے کہ ترکی اور شام میں 6 فروری کو آنے والے ہولناک زلزلے میں اموات کی تعداد 34 ہزار سے تجاوز کرچکی ہے۔