شہر قائد میں سندھ رینجرز اور پولیس نے مشترکہ کارروائی کرتےہوئے6 ملزمان کو گرفتار کرکے ان کے قبضے سے لوٹے گئے لاکھوں روپے برآمد کرلیےہیں۔

سندھ رینجرز کے ترجمان کےمطابق ملزمان نے دوران تفتیش ڈکیتی کی متعدد وارداتیں کرنے کا انکشاف کیا ہے، ملزمان نے کورنگی میں نجی کمپنی کی وین سے لاکھوں روپے لوٹنے کا اعتراف بھی کیا ہے۔

ترجمان رینجرز کا مزید کہنا ہےکہ سی سی ٹی وی فوٹیج میں ملزمان کو واردات کرتے دیکھا جاسکتا ہے۔

ملزمان میں ڈکیت گروہ کےسرغنہ عدنان سمیت سلمان، ظہیر عرف گجر، کاشف، عبداللہ اور عمر شامل ہیں۔ ڈکیت گروہ کا سرغنہ عدنان متعدد بار گرفتار ہوکر جیل بھی جاچکا ہے۔

ملزمان کے قبضے سے اسلحہ، ایمونیشن، موٹر سائیکل اور موبائل فونز برآمد کیےگئےہیں، گرفتار ملزمان کو مزید قانونی کارروائی کےلیے پولیس کے حوالے کردیا گیا۔