اسلام آباد میں فوج تعینات کردی گئی جس کا نوٹیفکیشن جاری کردیا گیا ہے۔

پاک فوج کے دستے اسلام آباد کے مختلف مقامات پر تعینات کردیئے گئے ہیں۔ فوج کو وزارت داخلہ نے تعیناتی کی منظوری دی ہے۔

وفاقی کابینہ نے پنجاب، خیبرپختونخوا اور اسلام آباد میں فوج تعینات کرنے کی توثیق کردی ہے۔

دوسری جانب ایک بیان میں آئی جی اسلام آباد ناصر اکبر کا کہنا ہے کہ فیصد حالات نارمل ہیں، فوج کو تنصیبات کو محفوظ بنانے کے لیے طلب کیا گیا ہے، ریاست کی طاقت کے آگے کوئی نہیں ٹھہر سکتا، عوام کو شرپسندوں سے بچانے کے لیے فوج بلائی گئی۔

انہوں نے کہا کہ پولیس اپنا کام معمول کے مطابق کرتی رہے گی، گرفتاریاں مسلسل ہورہی ہیں، 1400 سے قریب ملزمان کو پکڑا جا چکا ہے۔

آئی جی اسلام آباد کا کہنا تھا کہ ساڑھے 4 ہزار کیمروں میں فوٹیجز محفوظ کرلی گئیں، ساڑھے 7 سو گاڑیوں کی بھی شناخت کرلی گئی ہے، لہٰذا سب کو ان کے گھروں سے پکڑیں گے۔

اس سے قبل آئی جی اسلام باد کا کہنا تھا کہ شہر میں ایک دو جگہ کے علاوہ تمام جگہ حالات ٹھیک ہیں، پولیس ان جگہوں پر کارروائی کررہی ہے تاکہ لوگوں کو منتشرکرسکیں۔

آئی جی اسلام آباد نے کہا کہ مظاہرین نے نجی گاڑیوں کو روک کر زدوکوب کیا، لوگوں سے گزارش ہے پرامن احتجاج کا حق ضرور استعمال کریں، لیکن سرکاری، غیر سرکاری یا نجی املاک کو نقصان نہ پہنچائیں۔

آئی جی اسلام آباد ناصر اکبر نے کہا کہ پوری کوشش کررہے ہیں حالات معمول پر آسکیں، ہماری کوشش ہے کوئی بھی آمدورفت متاثر نہ ہو، مقدمات جرم کی نوعیت کے مطابق ہوتے ہیں، اسلام آباد میں پولیس اور ایف سی کام کررہی ہے، اسلام آباد میں تاحال فوج طلب کرنے کی ضرورت نہیں۔