جماعت اسلامی کراچی کے امیر حافظ نعیم الرحمان نے کہا ہے کہ پیپلزپارٹی نے میئر کراچی کا الیکشن چوری کیا، قبضے کو برقرار نہیں رہنے دیں گے۔

اسلام آباد میں پریس کانفرنس کے دوران حافظ نعیم نے کہا کہ پیپلزپارٹی کا کراچی میں مینڈیٹ ہی نہیں ہے، ہمیں الیکشن چوری کے اس عمل کوروکنا ہوگا، کراچی میئر کا الیکشن اس فلم کا ٹریلر ہے جو پورے ملک میں چلائی جانی ہے۔

میئرکراچی کا الیکشن ہارنے والے جماعت اسلامی کے امیدوار کا مزید کہنا تھا کہ کراچی کے مینڈیٹ پر شب خون مارا گیا، ہماری 192 اور پیپلزپارٹی کی 173 سیٹیں تھیں،31 امیدواروں کو انتخاب کے دن آنے نہیں دیا گیا۔

انھوں نے کہا کہ کراچی پورے پاکستان کی نمائندگی کرتا ہے، بدترین حالات میں بھی کراچی پاکستان کا معاشی حب ہے، میئر کراچی کے انتخابات کے حوالے سے عدالت سے رجوع کریں گے۔