وزیراعظم شہباز شریف نے کہا ہے کہ حکومت نے معدنیات، زراعت اور آئی ٹی سمیت دیگر شعبوں کے فروغ پر بھرپور توجہ مرکوز کر رکھی ہے، زرعی شعبہ میں جدت لانے کیلئے ایک ہزار نوجوانوں کو سرکاری خرچ پر تعلیم کیلئے چین بھیج رہے ہیں۔

وزیراعظم محمد شہباز شریف نے پاکستانی کاروباری شخصیات اور سرمایہ کاروں سے گفتگو کرتے ہوئے کہا کہ ملک کے معاشی استحکام کا سفر جاری ہے، پالیسی ریٹ میں نمایاں کمی آئی ہے۔ پاکستان معدنی وسائل سے مالا مال ملک ہے، کان کنی اور معدنی وسائل کی ترقی پر بھرپور توجہ مرکوز کر رکھی ہے۔

وزیراعظم نے کہا کہ پاکستان میں انفارمیشن ٹیکنالوجی کے شعبہ میں بے پناہ صلاحیت ہے، آئی ٹی برآمدات میں مسلسل اضافہ ہو رہا ہے، نوجوان ہمارا اثاثہ ہیں، ہماری 60 فیصد آبادی نوجوانوں پر مشتمل ہے، ان کو آئی ٹی سمیت مختلف شعبوں میں تربیت دے کر ملازمتوں کے مواقع پیدا کر رہے ہیں، جنوری میں ترسیلات زر 3 ارب ڈالر رہی ہیں جو گذشتہ کئی سال کے مقابلے میں ریکارڈ ہے، برآمدات میں نمایاں اضافہ ہوا ہے۔

انہوں نے کہا کہ آئی ایم ایف پروگرام کے بعد میکرو اکنامک صورتحال میں بہتری آئی ہے۔ انہوں نے کہا کہ مشکل چیلنجز کے باوجود ملکی معیشت کو درست سمت میں گامزن کر دیا ہے۔ پاکستانی زرعی وسائل سے مالا مال ہے، جدید ٹیکنالوجی سے زرعی شعبہ میں انقلاب برپا کیا جا سکتا ہے، گندم اور کپاس کی زیادہ پیداوار حاصل کی جا سکتی ہے۔

وزیراعطم کا کہنا تھا کہ ہم نے جدید ٹیکنالوجی سے فائدہ نہیں اٹھایا، ہم ایک ہزار فریش گریجویٹ کو ایگری ٹیک کی تعلیم کیلئے سرکاری خرچ پر چین بھیجیں گے جو زراعت کے مختلف شعبوں میں جدید تربیت حاصل کریں گے، اس سے ملک میں زرعی پیداوار بڑھانے اور ویلیو ایڈڈ میں مدد ملے گی۔

انہوں نے کہا مزید کہا کہ کہ ہم تیزی سے فیصلے کر رہے ہیں اور ٹیم ورک کے ساتھ آگے بڑھ رہے ہیں، ٹیم ورک سے معاشرے میں تبدیلی لائی جا سکتی ہے۔

شرکاء نے وزیرِ اعظم کی قیادت میں حکومت کی کاروبار دوست پالیسیوں کی تعریف کی اور معاشی استحکام کے بعد ملکی ترقی کے سفر کی شروعات پر خراج تحسین پیش کیا۔