پاکستان پیپلز پارٹی کے چئیرمین بلاول بھٹو زرداری کے حالیہ بیان نے بھارت کی بڑی سیاسی جماعت میں پھوٹ ڈال دی۔

واضح رہے کہ پاکستان پیپلز پارٹی کے چیئرمین کی جانب سے مودی سرکار کو دو ٹوک پیغام دیا گیا تھا کہ اب بھارت کی طرف سے سندھو پر حملہ ہوا ہے، بھارت کو کہتا ہوں سندھو ہمارا ہے اور ہمارا رہے گا، اس دریا سے ہمارا پانی بہے گا یا اُن کا خون، پاک فوج بارڈر پر بھارت کو منہ توڑ جواب دے گی۔

میڈیا رپورٹس کے مطابق بلاول بھٹو کے اس بیان پر اتوار کے روز بھارتی نیشنل کانگریس اور لوک سبھا کے ممبر ششی تھرور کا بیان سامنے آیا تھا جس میں انہوں نے کہا تھا کہ ہمارا پاکستان کے خلاف کوئی جارحانہ ارادہ نہیں ہے، لیکن اگر وہ کچھ کرتے ہیں تو انہیں جواب کے لیے تیار رہنا چاہیے، اگر خون بہا تو یہ شاید ان کی طرف زیادہ ہو گا۔

تاہم ششی تھرور کی ہی پارٹی کانگریس لیڈر ادت راج نے تھرور کے موقف پر سوال اٹھایا اور پوچھا کہ کیا آپ بی جے پی کے ترجمان ہیں؟

مقبوضہ کشمیر میں بھارتی دہشتگردی، کشمیریوں کے گھروں کو دھماکا خیز مواد سے اڑایا جانے لگا

کانگریسی لیڈر ادت راج نے ششی تھرور کے بیان پر طنز کرتے ہوئے کہا کہ وہ ”سپر بی جے پی آدمی“ بننے کی کوشش کر رہے ہیں۔

بھارتی میڈیا کے مطابق ادت راج نے ششی تھرور سے سوال کیا کہ “میں ششی تھرور سے پوچھنا چاہتا ہوں، کیا وہ کانگریس پارٹی میں ہیں یا بی جے پی میں؟…کیا وہ ایک سپر بی جے پی آدمی بننے کی کوشش کر رہے ہیں؟ “کیا بی جے پی نے انہیں اپنا ترجمان مقرر کیا ہے؟

ہندو پنڈت نے پاکستان کا پانی روکنے کے بھارتی دعوؤں کا پول کھول دیا

واضح رہے کہ 22 اپریل کو پہلگام میں سیاحوں پر حملہ ہوا تھا، جس میں مقامی لوگوں سمیت 26 سیاح مارے گئے تھے۔ اس کے بعد پانچ نکاتی منصوبے کے تحت بھارت نے سندھ طاس معاہدہ معطل کیا جس کے جواب میں پاکستان نے صرف بھارت کیلئے اپنی فضائی حدود بند کردی۔