ٹک ٹاکر ثناء یوسف کے قتل کیس میں گرفتار ملزم عمر حیات کو ڈسٹرکٹ اینڈ سیشن کورٹس اسلام آباد میں پیش کر دیا گیا۔ پولیس نے ملزم کو علاقہ مجسٹریٹ محمد حفیظ کی عدالت میں پیش کیا، جہاں پراسیکیوشن کی جانب سے سات روزہ جسمانی ریمانڈ کی درخواست کی گئی۔

پولیس کے مطابق شناخت پریڈ مکمل ہوچکی ہے، جس میں مقتولہ کی والدہ اور پھوپھو نے ملزم کو شناخت کیا۔ پراسیکیوشن کا مؤقف ہے کہ ملزم سے زیر استعمال موبائل فون اور گاڑی کی برآمدگی کے لیے جسمانی ریمانڈ درکار ہے۔

عدالت میں بیان دیتے ہوئے ملزم عمر حیات نے کہا کہ اس نے موبائل فون پولیس کے حوالے کر دیا ہے، ساتھ ہی عدالت سے میڈیکل کروانے کی درخواست بھی کی، جس پر عدالت نے ملزم کے میڈیکل کا حکم جاری کر دیا۔

ملزم نے عدالت کو یہ بھی بتایا کہ اس کا اپنے اہل خانہ سے رابطہ نہیں ہو سکا اور انہیں یہ نہیں معلوم کہ وکیل کرنا ہے یا نہیں۔ عدالت نے تمام دلائل سننے کے بعد ملزم کا 4 روزہ جسمانی ریمانڈ منظور کرتے ہوئے پولیس کے حوالے کر دیا۔