پاکستان کے معروف ایتھلیٹ اور اولمپک گولڈ میڈلسٹ ارشد ندیم کو پیرس اولمپکس 2024 میں شاندار کارکردگی کے اعتراف میں عالمی شہرت یافتہ جریدے فوربز نے اپنی ’تھرٹی انڈر 30 ایشیا‘ کی فہرست میں شامل کر لیا ہے۔

ارشد ندیم نے جیولن تھرو کے مقابلے میں 92.97 میٹر کی ناقابلِ یقین تھرو کے ذریعے پاکستان کو انفرادی کھیلوں میں پہلا اولمپک گولڈ میڈل دلایا۔ فوربز نے ان کی کارکردگی کو ’اسٹننگ شو‘ قرار دیتے ہوئے انہیں ایشیا کے نمایاں نوجوانوں میں شامل کیا۔

یہ اعزاز ارشد ندیم کی نہ صرف عالمی سطح پر پذیرائی کا ثبوت ہے بلکہ پاکستان میں انفرادی کھیلوں کے فروغ کے لیے بھی ایک سنگِ میل کی حیثیت رکھتا ہے۔

واضح رہے کہ ارشد ندیم اس سے قبل بھی دولتِ مشترکہ کھیلوں اور ایشین گیمز میں پاکستان کے لیے کئی تمغے جیت چکے ہیں، اور اب ان کی یہ عالمی سطح پر پہچان پاکستان کے کھیلوں کے افق پر ایک تاریخی اضافہ ہے۔