بولی وڈ کی اداکارہ انوشکا شرما کا سوشل نیٹ ورکنگ کی ویب سائٹوں پر تجربہ زیادہ اچھا نہیں رہا ہے۔

بی بی سی اردو کے مطابق اپنے بوائے فرینڈ وراٹ کوہلی کے حوالے سے انوشکا اکثر لوگوں کے نشانے پر رہتی ہیں۔ انٹرنیٹ پر ٹرول کرنے والے لوگوں کو وہ بزدل بتاتی ہیں۔

ان کا کہنا ہے کہ 'سوشل میڈیا کی سائٹوں پر جو لوگ کسی کو بھی ٹرول کرتے ہیں یا بھلا برا کہتے ہیں، میں انہیں بزدل کہوں گی کیونکہ جو سچے لوگ ہیں اور کام کر رہے ہیں ان کے پاس ان تمام چیزوں کیلئے وقت نہیں ہے۔ صرف فالتو لوگوں کے پاس ہی ایسی بکواس چیزوں کے لیے ٹائم ہوتا ہے۔'

حال ہی میں انوشکا کو یہ کہتے ہوئے ٹرول کیا گیا تھا کہ ان کی آنے والی فلم 'فلّوری'کو کرکٹ کھلاڑی وراٹ کوہلی پروڈیوس کر رہے ہیں۔

بعد میں اس سوال پر انوشکا نے اس کی وضاحت بھی پیش کی تھی۔

دوسری جانب 8 مارچ کو یوم خواتین کے موقعے پر وراٹ کوہلی نے اپنی دوست انوشکا شرما اور اپنی ماں کیلئے ایک خاص پیغام پوسٹ کیا۔

اپنی پوسٹ میں وراٹ نے دونوں کی تصاویر شیئر کیں اور لکھا: 'یوم خواتین پر تمام خواتین کو نیک خواہشات، لیکن خصوصی طور پر میں اپنی زندگی کی دو سب سے مضبوط خواتین کو اس دن کی مبارک باد پیش کرنا چاہتا ہوں۔'

انہوں نے کہا: 'میری ماں جنہوں نے انتہائی مشکل وقت میں بھی ہمارے خاندان کو سنبھالے رکھا اور دوسری انوشکا شرما جو تمام طرح کی رکاوٹوں سے لڑتی ہوئی سچائی کیلئے کھڑی ہیں اور پرانے رسم و رواج کو چیلنج کر رہی ہیں۔'

اپنی آنے والی فلم 'فلّوری' میں انوشکا شرما ایک بھوت کا کردار ادا کر رہی ہیں۔

اپنے اس 'مختلف' کردار کے بارے میں انوشکا کہتی ہیں: 'میں سکرین پر انسان بنتے بنتے بور ہوچکی تھی۔ مجھے کچھ مختلف کرنا تھا۔ بھوت بن کر مجھے مزہ آیا۔ مجھے لگتا ہے میں نے بھوتوں کی اچھی طرح سے نمائندگی کی ہے۔'

بطور پروڈیوسر انوشکا کی یہ دوسری فلم ہے۔

ایکٹنگ اور پروڈکشن میں سے وہ کیا کرنا زیادہ پسند کرتی ہیں؟ اس سے متعلق ایک سوال کے جواب میں انوشکا نے کہا: 'میں کہوں گی زیادہ ذمہ داریوں کے ساتھ میں اچھا پرفارم کر پاتی ہوں کیونکہ فلم کے ہر پہلو سے میں منسلک رہتی ہوں۔ ایسی صورت میں میں ایکٹنگ اور پروڈکشن دونوں انجوائے کرتی ہوں۔'

فلم 'فلّوری' میں انوشکا کے ساتھ سنگر اور اداکار دلجيت دوساجھ بھی نظر آئیں گے۔

بشکریہ بی بی سی اردو