ممبئی:بھارتی فلم انڈسٹری کےموجودہ دور کے کامیاب اداکار نوازالدین صدیقی کی گھریلو زندگی ان دنوں پریشانی کا شکار نظر آتی ہے،گزشتہ چند روز قبل  بھارتی میڈیا میں یہ افواہیں گردش کررہی تھیں کہ وہ اپنی اہلیہ  سے علیحدگی اختیار کررہے ہیں بعد ازاں انہوں نے ان خبروں کی تردید کردی۔

بولی وڈ ببل کے مطابق انہوں نے بھارت کے مقبول میگزین کو ان کی نجی زندگی کے بارے میں افواہیں پھیلانے کیلئے نوٹس بھی بھیجا تھا۔

حال ہی میں نواز کی نئی فلم"منٹو"کی تشہیر کے دوران  یہ معاملہ ایک بار پھر منظر عام پر آگیا جس پر انہوں نے ردعمل ظاہر کرتے ہوئے کہا کہ "مجھے لگتا ہے جب آپ اسٹار بن جاتے ہیں تو ا س طرح کی پریشانیاں اسٹارڈم کے ساتھ آتی ہیں،لیکن یہ سب بہت عجیب ہے،میں اپنی شادی شدہ زندگی میں بہت خوش ہوں،ہمارے بچے ہیں اور ہم دونوں بہت اچھے والدین ہیں۔

میری اہلیہ نے زندگی کے  اتار  چڑھاؤ میں میرا ہر طرح سے ساتھ دیا ہے،لوگ سنسنی پھیلانے کیلئے کچھ بھی لکھتے ہیں اورمیں یہ سب پڑھ کر ہنستا ہوں۔

واضح رہے کہ  گزشتہ ہفتے نواز الدین صدیقی اور ان کی اہلیہ  انجلی نے اپنی شادی کی سالگرہ منائی ہے،انجلی نے فیس بک پوسٹ بھی شیئر کی  جس میں پیغام درج تھا کہ"یہ سال جو ہم نے گزارے  تم (نوازالدین صدیقی)ایک والد اور شوہر کے طور پر بہترین تھے،میں تمہارے ساتھ خود کو محفوظ سمجھتی ہوں ،میں اپنی باقی زندگی  اسی طرح خوشی خوشی گزارنا چاہتی ہوں"۔

اس پیغام سےظاہر ہوتا ہے کہ نواز کی شادی شدہ زندگی  بالکل ٹھیک گزررہی ہے اور ان کی اہلیہ سے علیحدگی کے بارے میں پھیلائی جانے والی افواہوں میں کوئی سچائی نہیں۔