'بہترین حکمت عملی سے عام آدمی کی مشکلات کم کی گئیں'
وفاقی وزیراطلاعات شبلی فرازکا کہنا ہے کہ حکوت نے بہترین حکمت عملی سے کورونا کے خلاف قیمتی جانیں اور معیشت دونوں کو زیادہ نقصان سے بچایا ۔ بہترین حکمت عملی سے عام آدمی کی مشکلات کم کی گئیں ۔ این سی او سی ، ڈاکٹرز ، میڈیا سمیت سب محکموں اوراداروں نے اپنا کردار ادا کیا۔
وفاقی وزیر اطلاعات شبلی فرازنے اسلام آباد میں معاون خصوصی برائے ڈیجیٹل پاکستان تانیہ ایدروس اور فوکل پرسن برائے کورونا ڈاکٹر فیصل کے ہمراہ پریس کانفرنس کی۔ شبلی فراز نے کہا کہ جب کورونا جیسے موضی مرض نے پاکستان کو اپنی لپیٹ میں لیا تو ہماری لیڈر شپ نے وہ راستہ اختیار کیا جس سے غریب افراد کو ایسا ماحول ملے کہ ان کی روزی روٹی چلتی رہے۔عمران خان نے ایسی حکمت عملی ترتیب دی جس سے صحت اور روزگار دونوں چل سکیں ۔ اپوزیشن لاک ڈاؤن کےلئے دباؤ ڈالتی رہی۔
وزیراطلاعات نے کہا مکمل لاک ڈاؤن سے معیشت تباہ ہو سکتی تھی لیکن عمران خان کسی مقام پر لڑکھڑائے نہیں اور وہ کردار ادا کیا کہ ہماری بہترین حکمت عملی کو دنیا بھر میں فالو کیا جانے لگا۔
انہوں نے میڈیا اور میڈیل اسٹاف کے کردار کی تعریف بھی کی۔
معاون خصوصی تانیہ ایدروس نے کہا کہ کورونا کے حوالے سے این سی او سی کا قیام ایک عالمی مثال ہے، ہم نے ایسا سسٹم قائم کیا جس سے ہمیں تمام شہروں کا ڈیٹا ریئل ٹائم میں ملے۔ اس کےلئے آرٹیفشل انٹیلی جنس کا استعمال بھی عمل میں لایا۔
فوکل پرسن برائے کورونا ڈاکٹر فیصل نے کہا کہ کورونا کے خلاف وزیراعظم کا مشن تھا کہ لوگوں کو مشکلات کا سامنا بھی نا کرنا پڑے اور کورونا پر کنڑول بھی کر سکیں۔
ڈاکٹر فیصل نے عوام سے عید الاضحیٰ پر احتیاطی تدابیر اختیار کرنے کی اپیل بھی کی ہے۔
Comments are closed on this story.