اداکارہ آمنہ شیخ نے دوسری شادی کی تصدیق کردی
پاکستان کی معروف سپر ماڈل و اداکارہ آمنہ شیخ نے اپنی دوسری شادی کی تصدیق کردی، انہوں نے عمر فاروقی نامی سعودی شہری کو اپنا جیون ساتھی بنالیا، وہ ایک معروف کاروباری شخصیت ہیں۔
تفصیلات کے مطابق 38 سالہ اداکارہ نے 8 اگست کو انسٹاگرام پر ایک تصویر شیئر کی تھی جس میں ایک کے اوپر ایک تین ہاتھ (ایک ہاتھ چھوٹا تھا اور بچی کا محسوس ہو رہا تھا) دکھائی دے رہے تھے۔ اس کے علاوہ بچی کے ہاتھ کی ہتھیلی پر دو انگوٹھیاں بھی رکھی ہوئی نظر آرہی تھیں۔
اس تصویر کو شیئر کرتے ہوئے آمنہ نے کوئی کیپشن یا ایموجی استعمال نہیں کی تھی جس کی وجہ سے مداح تجسس میں مبتلا ہوگئے تھے اور ان کی دوسری شادی سے متعلق چہ مگوئیاں شروع ہوگئی تھیں تاہم اب اداکارہ نے خود ہی اپنے شوہر کے ساتھ تصویر شیئر کرتے ہوئے دوسری شادی کی تصدیق کردی ہے۔
اس تصویر کے منظرعام پر آتے ہی مداحوں اور ساتھی اداکاروں میں مبارکبادیں دینا شروع کردی تھیں تاہم اب اداکارہ نے ایک پوسٹ میں مبارکباد دینے والوں اور نیک خواہشات کا اظہار کرنے والوں کا شکریہ ادا کیا ہے۔
آمنہ نے اپنے شوہر اور بیٹی میسا کا ایک فوٹو کولاج بھی شیئر کیا۔
واضح رہے کہ 2005 میں محب مرزا کے ہمراہ شادی کے بندھن میں بندھنے والی اداکارہ آمنہ شیخ کی اپنے پہلے شوہر سے اکتوبر 2019 میں علیحدگی ہوئی تھی، دونوں کی ایک بیٹی میسا بھی ہے جس کی پیدائش 2015 میں ہوئی تھی۔
Comments are closed on this story.