Aaj.tv Logo

سابق صدر مملکت اورچیئرمین پیپلز پارٹی پارلیمنٹیرئنزآصف علی زرداری نے عمران خان کی جانب سے مریم نواز سے متعلق نازیبا زبان استعمال کرنے کی مذمت کی ہے۔

ایک بیان میں سابق صدر آصف علی زرداری نے کہا کہ جن گھروں میں مائیں، بہنیں ہوں وہ ایسی زبان استعمال نہیں کیا کرتے، خدارا اس سیاست میں اتنے نیچے نہ گر جاؤ۔

آصف زرداری نے مزید کہا کہ مائیں، بہنیں، بیٹیاں سب کی سانجھی ہوتی ہیں، یہ ہی پیغام بی بی شہید محترمہ بینظیر بھٹو چھوڑ کر گئی ہیں۔ کوئی چیف جسٹس کو پرسنل ابزرویشن کا خط لکھے اور اس بات پر نوٹس لیں۔

خیال رہے کہ عمران خان نے ملتان میں جلسے سے خطاب کرتے ہوئے مریم نواز کو کہا تھا کہ مریم نواز نے کل کہیں تقریر کرتے ہوئے کئی دفعہ اس جذبے سے اور اس جنون سے میرا نام لیا کہ میں اس کو کہنا چاہتا ہوں کہ مریم دیکھو تھوڑا دھیان کرو، تمہارا خاوند ہی ناراض نہ ہوجائے جس طرح تم بار بار میرا نام لیتی ہو۔