کراچی علاقے بن قاسم میں پولیس کے اشارے پر ڈرائیور نے گاڑی روکنے کے بجائے بھگادی جس کو تعاقب کرکے گلشن حدید میں روکا گیا تو گاڑی سے دولاشیں برآمد ہوئیں۔

پولیس کا کہنا ہے کہ تلاشی پرگاڑی کی ڈِگی سے 2 نوجوانوں کی لاشیں ملیں ہیں جس کے بعد دونوں لاشیں جناح اسپتال منتقل کردی گئی ہیں۔ مرنے والے دونوں افراد پارکو کی لائن سے تیل چوری کرنے میں ملوث تھے۔

ایس ایچ او بن قاسم ٹاؤن فراست شاہ نے کہا کہ کار سوارسمیت 3 افراد کو حراست میں لے لیا ہے، ملزمان گودام میں سُرنگ بنا کرتیل چوری کرتے تھے، دونوں افراد کی موت سُرنگ میں بیٹھنے سے ہوئی ہے۔

پولیس نے بتایا کہ پانچ ملزمان نے 10 دن پہلے بن قاسم ٹاؤن میں ایک گودا کرائے پر لیا تھا اور گودام کے اندر سے سُرنگ بنا کر پارکو کی لائن سے آئل چوری کرنے کے لیے کلپ لگائے گئے تھے۔

ایس ایچ او نے کہا کہ واقعے میں ملوث تینوں ملزمان کو گرفتار کرلیا ہے اور گاڑی بھی تحویل میں لیکر کر واقعے کے حوالے سے مزید تفتیش کی جا رہی ہیں۔