مکہ مکرمہ میں 8 پاکستانی عمرہ زائرین ہوٹل میں ہونے والی آتشزدگی کے باعث جاں بحق ہوگئے، جس کی دفتر خارجہ نے تصدیق کردی ہے۔

شاہراہ ابراہیم خلیل پر واقع ہوٹل کی تیسری منزل میں آتشزدگی کا واقعہ گزشتہ رات پیش آیا تھا۔ جاں بحق افراد میں مرد اور خواتین شامل ہیں جن کا تعلق پاکستان کے علاقے قصور اور بورے والا سے ہے۔

مزید پڑھیں: شعیب اختر کی کلاک ٹاور سے خانہ کعبہ کی ویڈیو سوشل میڈیا پر وائرل

دفتر خارجہ نے ہلاکتوں کی تصدیق کرتے ہوئے کہا کہ ہوٹل میں آگ لگنے سے آٹھ پاکستانی شہری جاں بحق اور چھ زخمی ہوئے، پاکستانی سفارتی مشن مقامی حکام سے رابطے میں ہے۔

دوسری جانب وزیراعظم شہبازشریف نےعمارت میں آتشزدگی کے واقعے پر رنج وغم کا اظہار کرتے ہوئے متاثرہ خاندانوں کے ساتھ اظہار ہمدردی، تعزیت اور مرحومین کی مغفرت اور اہل خانہ کے لئے صبر جمیل کی دعا کی۔

شہبازشریف نے وزارت مذہبی امور کو زخمیوں کی بہترین دیکھ بھال کی ہدایت کرتے ہوئے کہا کہ جاں بحق افراد کے لواحقین کو ہرممکن سہولت فراہم کی جائیں۔