روس میں ایک عجیب و غریب واقعہ پیش آیا ہے جہاں ایک شخص نے اپنے خوابوں پر قابو پانے کیلئے اپنے سر میں ڈرل مشین سے سوراخ کر ڈالا۔

روس کے شہر نووسیبرسک میں 40 سالہ روسی شہری مائیکل راڈوگا نے ٹویٹر پر بتایا کہ اس نے اپنی کھوپڑی میں ڈرل مشین کا استعمال کرتے ہوئے ایک چپ ڈالی تاکہ وہ اپنے خوابوں پر قابو پا سکے گا۔

راڈوگا نے اس کیلئے گھنٹوں نیورو سرجری کے حوالے سے یوٹیوب ویڈیوز دیکھیں اور پانچ بھیڑوں پر تجربہ کرنے کے بعد 17 مئی کو اپنا آپریشن کیا۔

تاہم، جراحی کے تجربے کی کمی کی وجہ سے چار گھنٹے کی سرجری کے دوران اس کا تقریباً ایک لیٹر خون ضائع ہوا اور وہ نیم مردہ حالت میں پہنچ گیا۔

راڈوگا نے بتایا کہ ’17 مئی 2023 کو، میں نے خود اپنے دماغ کی موٹر کارٹیکس کی ٹریپینیشن، الیکٹروڈ امپلانٹیشن، اور برقی محرک کا مظاہرہ کیا۔ مجھے خواب دیکھنے کے دوران دماغی محرک کو جانچنے کے لیے اس کی ضرورت تھی‘۔

راڈوگا کی طرف سے شیئر کی گئی تصاویر میں، اسے پیپر کلپس کا استعمال کرتے ہوئے اپنے سر کی جلد کو پکڑے ہوئے، اور اپنی کھوپڑی کے پچھلے حصے میں سوراخ کرتے ہوئے دیکھا جا سکتا ہے۔

اس کے بعد اس نے اپنے دماغ میں پلاٹینم اور سلیکون امپلانٹ لگایا، جس کے بارے میں اس نے دعویٰ کیا کہ اس سے خوابوں میں بعض افعال کو متحرک کرنے کے لیے بجلی استعمال کرنے کی اجازت ملی۔

تاہم، حالت خراب ہونے پر چپ کو ہٹانے کے لیے اسے اسپتال لے جایا گیا۔

ایک اور ٹویٹ میں، اسے چہرے پر متعدد پٹیوں اور ایک ایکس رے کے ساتھ دیکھا جا سکتا ہے جس میں اس کے سر کے اندر موجود الیکٹروڈ ظاہر ہیں۔