سپریم کورٹ کی جانب سے نیب آرڈیننس ترمیم کالعدم قرار دینے کے فیصلے پر عمل درآمد جاری ہے، کراچی کی احتساب عدالت نے ڈاکٹر عاصم حسین سمیت 8 ملزمان کو طلب کرلیا۔

عدالت نے ڈاکٹر عاصم اور دیگر کے خلاف 17 ارب روپے کی کرپشن کا کیس سماعت کے لئے مقرر کرتے ہوئے ڈاکٹر عاصم حسین سمیت 8 ملزمان کو طلب کیا۔

ریفرنس میں نامزد دیگر ملزمان میں بشارت مرزا، ذوہیر صدیقی ، شعیب وارثی، خالد رحمان، ملک عثمان، یوسف جمیل اور اقبال زیڈ احمد شامل ہیں۔

عدالت نے تمام ملزمان کو 7 اکتوبر کو پیش ہونے کی ہدایت کردی۔

عدالت کا کہنا ہے کہ سپریم کورٹ نے 15 ستمبر کو نیب ترامیم کالعدم قرار دے دی ہیں، ملزمان کے خلاف دائر ریفرنس اب بحال ہوچکا ہے۔

ملزمان نے نیب ترمیم کے بعد عدالت کے دائرہ اختیار کو چیلنج کیا تھا۔ سندھ ہائیکورٹ نے ملزمان کے خلاف ریفرنس واپس چیئرمین نیب کو ارسال کرنے کا حکم دیا تھا۔