پاکستان تحریک انصاف کے رہنما شیر افضل مروت کا کہنا ہے کہ بانی پی ٹی آئی عمران خان کے خلاف سائفر کیس میں منگل تک اچھی خبر ملے گی۔

پی ٹی آئی ایبٹ آباد کے رہنماء روح الامین کے گھر افطار ڈنر کے بعد مشتاق احمد غنی کے ہمراہ میڈیا سے گفتگو کرتے ہوئے شیر افضل مروت نے کہا کہ خیبرپختونخوا کی عوام نے تاریخ رقم کرتے ہوئے تیسری مرتبہ پی ٹی آئی پر اعتماد کیا ہے، پی ٹی آئی حکومت اپنی ذمہ داری پوری کرتے ہوئے خیبرپختونخوا کے عوام کی بھرپور خدمت کرے گی۔

انہوں نے کہا کہ بانی پی ٹی آئی کے خلاف سیاسی کیسز محض انتقامی کارروائیاں تھے، ان کے خلاف کیسز میں وکلاء کو مکمل جرح کا حق نہیں دیا گیا۔

شیر افضل مروت نے کہا کہ بانی پی ٹی آئی کے خلاف سائفر کیس میں منگل تک اچھی خبر ملے گی۔

ان کا کہنا تھا کہ مینڈیٹ چوری کی ریکوری کیلئے پلان مرتب کر لیا ہے جس کا آغاز 30 مارچ سے کریں گے، 8 فروری الیکشن میں آر آوز نے عوام کا مینڈیٹ چوری کیا، آر اوز نے عدالت میں فارم 47 کے حوالے سے سب نے جھوٹ بولا۔

ان کا کہنا تھا کہ سابق اسپیکر و ایم پی اے مشتاق احمد غنی کی کابینہ میں شمولیت کیلئے بانی پی ٹی آئی سے بات کروں گا، مشتاق غنی کو کابینہ میں شامل کروا کر عوام کو حق دلواؤں گا۔