اسلام آباد پولیس کی جانب سے عید کی چھٹیوں پر جانے والے افراد کو گھر چھوڑنے سے پہلے پولیس اسٹیشن پر اطلاع دینے کی ہدایت کی گئی، ڈی آئی جی آپریشنز اسلام آباد شہزاد ندیم بخاری نے کہا کہ عید کی چھٹیوں پر جانے والے مناسب سکیورٹی انتظامات کے ساتھ گھر چھوڑیں۔

ڈی آئی جی آپریشنز سید شہزاد ندیم بخاری کی جانب سے سیکیورٹی کے حوالے سے شہریوں کے لیے اہم ویڈیو پیغام جاری کیا گیا۔

ڈی آئی جی آپریشنز نے کہا کہ عید کی چھٹیوں پر جانے والے شہری مناسب سیکیورٹی انتظامات کے ساتھ گھر چھوڑیں۔

شہزاد ندیم بخاری نے کہا کہ گھر چھوڑنے سے پہلے اخبار والے کو بتائیں کہ وہ گھر اخبار نہ پھینکے، گھر چھوڑنے سے پہلے متعلقہ پولیس اسٹیشن اطلاع دیں اور گھر کو مکمل لاک کریں اور تسلی کرکے گھر چھوڑیں۔

ڈی آئی جی آپریشنز شہزاد ندیم بخاری نے مزید کہا کہ اسلام آباد پولیس آپ کی جان و مال کے تحفظ کے لیے ہمہ وقت کوشاں ہے۔

خیال رہے کہ حکومت پاکستان کی جانب سے جاری کردہ نوٹیفکیشن کے مطابق ملک میں ہفتے میں 6 دن کام کرنے والے دفاتر میں 10 سے 13 اپریل جبکہ ہفتے میں 5 روز کام کرنے والے دفاتر میں 10 سے 12 اپریل تک تعطیلات دی گئی ہیں۔