حب پمپنگ اسٹیشن پر کے الیکٹرک کی جانب سے اچانک بجلی کا بریک ڈاؤن ہو ا جس کے نتیجے میں66 انچ ایم ایس کی رائزنگ مین متاثر ہوگئی ۔

ترجمان واٹر کارپوریشن کے مطابق حب پمپنگ اسٹیشن پر بجلی کا بریک ڈاؤن کی اطلاع ملنے پر واٹر کارپوریشن حکام نے موقع پر پہنچ کر متاثرہ لائن کا معائنہ کیا۔

سی او او واٹر کارپوریشن انجینئر اسداللہ خان نے سختی سے ہدایت کی کہ متاثرہ لائن کی بحالی کا کام ہنگامی بنیادوں پر مکمل کیا جائے۔ جس پر چیف انجینئر واٹر کارپوریشن نے آگاہ کیا کہ متاثر لائن کا مرمتی کام اگلے 72 گھنٹوں میں مکمل کیا جائے گا۔

حب ڈیم سے شہر قائد کو پانی کی فراہمی عارضی طور پر معطل کردی گئی ہے۔ لائن متاثر ہونے کے باعث ڈسٹرکٹ ضلع غربی اور ضلع وسطی کے کچھ علاقے متاثر ہونگے۔

چیف انجینئر کا کہنا ہے کہ شہریوں سے درخواست ہے کہ وہ پانی کا استعمال احتیاط سے کریں تاکہ انہیں کسی قسم کی پریشانی کا سامنا نہ کرنا پڑے