وفاقی وزیر اطلاعات عطاءاللہ تارڑ نے کہا ہے کہ بھارت نے پہلگام حملے کا جھوٹا ڈراما رچایا جس کی حقیقت پوری طرح سامنے آچکی ہے، بھارت بوکھلاہٹ کا شکار ہو چکا ہے، بھارت کے فالس فلیگ آپریشن کے بعد افواج پاکستان مکمل طور پر پرعزم ہیں، پاکستان کسی بھی جارحیت کا مقابلہ کرنے کے لیے مکمل طور پر تیار ہے۔

وزیر اطلاعات عطا اللہ تارڑ نے پریس کانفرنس کرتے ہوئے کہا کہ پہلگام فالس فلیگ آپریشن کے بعد پاکستان کی نیشنل سیکیورٹی کمیٹی نے بھارت کو بھرپورجواب دیا، بھارت بوکھلاہٹ کا شکار ہوچکا ہے، بھارتی بیان پر پاکستان نے عملی طور پر اقدامات کیے۔

عطا اللہ تارڑ کا کہنا تھا کہ پاکستان کی فضائی حدود کو بھارتی طیاروں کے لئے بند کر دیا گیا، پاکستان نے بھارت کے لیے اپنی فضائی حدود بند کر دی ہے، بھارت سے تجارت مکمل طور پر بند ہے، کسی تیسرے ملک کے ذریعے بھی بھارت سے تجارت نہیں ہو سکتی، بھارت میں فضائی ٹکٹوں کی قیمتوں میں ہوشربا اضافہ ہوچکا ہے، بھارت میں متعدد فلائیٹس منسوخ یا تبدیل ہوئی ہیں، کچھ لمبے روٹس سے چل رہی ہیں۔

وزیر اطلاعات نے مزید کہا کہ بھارت کے فالس فلیگ آپریشن کے بعد افواج پاکستان مکمل طور پر پرعزم ہیں، پاکستان کسی بھی جارحیت کا مقابلہ کرنے کے لیے مکمل طور پر تیار ہے، نیشنل سیکیورٹی کمیٹی نے واضح کیا ہے کہ پاکستان پرامن ملک ہے، پاکستان کسی مس ایڈونچر کا بھرپور جواب دینا جانتا ہے، بھارت کی عالمی سطح پر سبکی ہو رہی ہے، پاکستان کو بیانیہ کی جنگ میں سبقت حاصل ہے۔