سعودی عرب کے صحت حکام نے جمعرات کو اعلان کیا کہ مکہ مکرمہ میں واقع کنگ عبداللہ میڈیکل سٹی کے آئی ہیلتھ سینٹر میں ماہر ڈاکٹروں کی بروقت اور مؤثر کارروائی سے ایک مصری خاتون حاجی کی بینائی بچا لی گئی، جو اچانک بصارت سے محروم ہو گئی تھیں۔

العربیہ ریپورٹ کے مطابق مکہ ہیلتھ کلسٹر کی جانب سے سعودی پریس ایجنسی کو جاری کردہ بیان کے مطابق مختلف معائنے سے معلوم ہوا کہ مریضہ کو ریٹینا ڈٹیچمنٹ اور موتیے کی شکایت تھی، جو اگر بروقت علاج نہ ہوتا تو مستقل بینائی سے محرومی کا باعث بن سکتی تھی۔

ماہر سرجنز نے فوری طور پر کامیاب آپریشن کیا جس کے بعد مریضہ کو اسی دن اسپتال سے فارغ کر دیا گیا اور وہ اپنی حج کی تیاریوں میں دوبارہ شامل ہو گئیں۔

بیان میں مزید کہا گیا ہے کہ مریضہ کی آنکھ کی حالت کو مستحکم رکھنے اور بصارت کی تدریجی بہتری کے لیے قریبی طبی نگرانی جاری ہے۔

واضح رہے کہ ہر سال سعودی عرب حج کے دوران 50,000 سے زائد طبی اور دیگر ماہرین کو 24 گھنٹے خدمات انجام دینے کے لیے تعینات کرتا ہے۔