دنیا کے بلند ترین پولو گراؤنڈ میں سجنے والا روایتی شندور پولو فیسٹیول اس سال 20 سے 22 جون تک شندور میں منعقد ہوگا۔ شندور کا یہ تاریخی میلہ خیبر پختونخوا حکومت، گلگت بلتستان حکومت اور فرنٹیئر کور (ایف سی) کے باہمی تعاون سے منعقد کیا جا رہا ہے۔

فیسٹیول کے لیے شندور کے خوبصورت میدان میں تمام تر تیاریاں مکمل کر لی گئی ہیں۔ اس رنگا رنگ میلے کا مرکز پولو کے سنسنی خیز مقابلے ہوں گے، جن میں خیبر پختونخوا اور گلگت بلتستان کی ٹیمیں حصہ لیں گی۔

اس بار میلے میں پولو میچز کے ساتھ ساتھ پیرا گلائیڈنگ اور پیرا ٹروپنگ کے بھی شاندار مظاہرے ہوں گے جو شائقین کی توجہ کا مرکز بنیں گے۔

فیسٹیول میں نہ صرف ملک بھر سے سیاح شرکت کے لیے تیار ہیں بلکہ غیر ملکی سیاحوں کی بڑی تعداد بھی شندور کے حسین مناظر اور ثقافتی سرگرمیوں سے لطف اندوز ہونے آ رہی ہے۔

شندور پولو فیسٹیول علاقائی ثقافت، مہمان نوازی، اور قدرتی حسن کا ایک شاندار امتزاج پیش کرتا ہے جو ہر سال سیاحت کو فروغ دینے میں اہم کردار ادا کرتا ہے۔