امریکی صدر ڈونلڈ ٹرمپ نے قطر میں قائم امریکی ایئر بیس ”العدید“ پر ایران کے میزائل حملے کو کمزور اور بے اثر قرار دیتے ہوئے کہا ہے کہ ایران نے اس حملے سے قبل امریکا کو پیشگی اطلاع دی تھی جس کے باعث کوئی جانی نقصان نہیں ہوا۔

ٹرمپ نے ایک سوشل میڈیا پوسٹ میں لکھا کہ ’مجھے یہ بتاتے ہوئے خوشی ہو رہی ہے کسی بھی امریکی کو کوئی نقصان نہیں پہنچا، اور بمشکل ہی کوئی مادی نقصان ہوا۔ سب سے اہم بات یہ ہے کہ لگتا ہے انہوں نے اپنا تمام غصہ نکال دیا ہے، اور اُمید ہے کہ اب مزید نفرت دیکھنے کو نہیں ملے گی۔‘

انہوں نے مزید کہا، ’میں ایران کا شکریہ ادا کرتا ہوں کہ اس نے ہمیں پیشگی اطلاع دی، جس کے باعث کسی کی جان نہیں گئی اور کوئی زخمی نہیں ہوا۔ شاید اب ایران خطے میں امن و ہم آہنگی کی جانب بڑھ سکتا ہے، اور میں پُرجوش انداز میں اسرائیل کو بھی یہی کرنے کی ترغیب دوں گا۔‘