پاکستان-افغان سرحد پر افغان طالبان کی بلااشتعال فائرنگ کے بعد پاک فوج نے فوری اور مؤثر جوابی کارروائی کی۔ خیبر پختونخوا کے مختلف سرحدی اضلاع میں کی گئی جوابی کارروائی کے دوران افغان فورسز کو بھاری جانی و مالی نقصان پہنچا اور متعدد چوکیوں و عسکری سازوسامان کو تباہ کر دیا گیا۔ سیکیورٹی ذرائع کا کہنا ہے کہ افغان طالبان رجیم کے 30 اہلکاروں کی ہلاکت کی مصدقہ اطلاعات ہیں۔

وزارت اطلاعات و نشریات کی جانب سے سماجی رابطے کی ویب سائٹ ”ایکس“ پر جاری بیان میں کہا گیا ہے کہ افغان طالبان نے غلط اندازہ لگاتے ہوئے خیبر پختونخوا میں پاک افغان سرحد کے متعدد مقامات پر بلا اشتعال فائرنگ کی جس کا پاکستان کی سیکیورٹی فورسز کی جانب سے فوری اور مؤثر جواب دیا جا رہا ہے۔

پاکستان اور افغانستان کے درمیان سرحدی علاقوں میں کشیدگی اس وقت بڑھی جب افغان طالبان کی جانب سے بلااشتعال فائرنگ کی گئی۔

محکمہ اطلاعات و نشریات کے مطابق افغان طالبان کی پاکستان-افغانستان سرحد پر بلااشتعال کارروائی کے فوری جواب میں پاک فوج نے مؤثر کارروائی کی۔ خیبر پختونخوا کے مختلف سیکٹرز، بشمول چترال، خیبر، مہمند، کرم اور باجوڑ میں بھرپور جوابی حملے کیے گئے۔

سرحدی جوابی کارروائی کے دوران افغان فورسز کو بھاری نقصان پہنچا، متعدد چوکیاں اور سازوسامان تباہ ہوئے۔ پاکستانی سیکیورٹی فورسز کی جوابی کاروائی سے افغان طالبان کے ٹھکانے تباہ اور خوارج بھاگ کھڑے ہوئے۔

پاکستان کی سیکیورٹی فورسز نے افغان طالبان کی سرحدی بلااشتعال کارروائی کا فوری اور مؤثر جواب دیا۔ سیکیورٹی ذرائع کے مطابق طالبان کے 30 اہلکار ہلاک ہوئے اور کواڈکاپٹرز کی حملے کی کوشش ناکام بناتے ہوئے تمام کواڈ کاپٹرز گرا دیے گئے۔

پاکستان کی سیکیورٹی فورسز کی جانب سے چھوٹے اور بڑے ہتھیاروں کے ذریعے گولہ باری جاری ہے، ہوائی ڈرونز کے ذریعے بھی چن چن کر افغان طالبان رجیم کی پوسٹوں کو نشانہ بنایا جا رہا ہے، افغان طالبان کا میڈیا اور سوشل میڈیا پر جھوٹے دعوے اور فیک ویڈیوز کی بھرمار جاری ہے۔

خیبر پختونخوا کے سرحدی اضلاع خیبر، چترال، مہمند، کرم اور باجوڑ میں افغان پوسٹس اور چوکیاں نشانہ بنا کر تباہ کی گئیں۔

سیکیورٹی ذرائع کے مطابق چترال سیکٹر پر واقع افغان طالبان کی چیک پوسٹ کو پاکستانی سیکیورٹی فورسز نے نہایت درستگی سے نشانہ بنا کر تباہ کر دیا۔ افغان طالبان نے پاک افغان سرحد کے مختلف مقامات پر فائرنگ کی، جس پر پاکستان کی سیکیورٹی فورسز نے جواب میں ناوگئی سیکٹر باجوڑ، تیراہ خیبر ، ضلع مہمند اور ارندو سیکٹر چکوال بھرپور جواب دیا، سیکیورٹی فورسز نے باجوڑ میں افغان کی 2 چوکیاں تباہ کر دیں۔

سیکیورٹی حکام کا کہنا ہے کہ ملک کی علاقائی سالمیت اور شہریوں کے تحفظ پر کوئی سمجھوتہ نہیں کیا جائے گا، سرحدی علاقوں میں نگرانی سخت کر دی گئی ہے اور کسی بھی جارحیت کا فوری جواب دیا جائے گا۔

وزارت اطلاعات نے بھی واضح کیا کہ پاکستان کی سیکیورٹی فورسز سرحد کی حفاظت اور کسی بھی قسم کی جارحیت کے خلاف سخت اور فوری جواب دینے کے لیے مکمل طور پر تیار ہیں، پاکستان خطے میں امن چاہتا ہے، لیکن بلااشتعال کارروائی کا منہ توڑ جواب دیا جائے گا۔