Aaj News

جمعہ, مارچ 29, 2024  
18 Ramadan 1445  

’غیرملکی شپنگ لائنز کا پاکستان کیلئے اپنی خدمات بند کرنے پر غور‘

بحران آنے سے پہلے سدباب نہیں کیا گیا تو معاشی صورتحال سنگین خطرات سے دو چار ہوسکتی ہے، پی ایس اے اے
شائع 21 جنوری 2023 06:15pm

شپنگ ایجنٹس نے نقدی کی کمی کا شکار پاکستانی حکومت کو خبردار کیا ہے کہ غیر ملکی شپنگ لائنز پاکستان کیلئے اپنی خدمات بند کرنے پر غور کر رہی ہیں جس کی وجہ سے تمام برآمدات رک سکتی ہیں۔ جبکہ بینکوں نے ڈالر کی قلت کی وجہ سے انہیں فریٹ چارجز بھیجنا بند کر دیا ہے۔

ڈان نیوز کے مطابق پاکستان شپز ایجنٹس ایسوسی ایشن (PSAA) کے چیئرمین عبدالرؤف نے ایک خط کے ذریعے وزیر خزانہ اسحاق ڈار کو متنبہ کیا کہ سرحدی ممالک کے علاوہ، پاکستان سے تقریباً تمام بین الاقوامی لاجسٹکس سمندر کے ذریعے فراہم کی جاتی ہیں اور کسی قسم کی رکاوٹ ملک کی بین الاقوامی تجارت کے لیے سنگین مسائل پیدا کر سکتی ہے۔

ایسوسی ایشن نے خبردار کیا کہ ”اگر بین الاقوامی تجارت روک دی گئی تو معاشی صورتِ حال مزید خراب ہو جائے گی۔“

انہوں نے مزید کہا کہ غیر ملکی شپنگ لائنز کارگو کی مقدار کم ہونے کی وجہ سے پہلے ہی پاکستان میں اپنی خدمات بند کرنے پر غور کر رہی ہیں۔

ڈان اخبار کی خبر کے مطابق، پی ایس اے اے کے چیئرمین نے اسٹیٹ بینک آف پاکستان (SBP) کے گورنر جمیل احمد، وزیر تجارت سید نوید قمر، اور بحری امور کے وزیر فیصل سبزواری کو بھی خطوط لکھے۔

چئیرمین عبدالرؤف نے متعلقہ وزارتوں اور محکموں سے درخواست کی کہ وہ فوری طور پر متعلقہ غیر ملکی شپنگ لائنز کو اضافی رقم کی بیرونی ترسیل کی اجازت دے کر پاکستان کی سمندری تجارت میں تسلسل کو یقینی بنانے کے لیے مداخلت کریں۔

خط میں مزید کہا گیا کہ ”متعلقہ غیر ملکی شپنگ لائنز کو اضافی مال بردار رقم کی بیرونی ترسیل بند کرنے کی وجہ سے، پاکستان کی سمندری تجارت میں رکاوٹ پیدا ہو رہی ہے، جو غیر ملکی شپنگ لائنز پر بہت زیادہ منحصر ہے۔“

بطور شپنگ کام کرنے والے اور آل پاکستان کسٹمز ایجنٹس ایسوسی ایشن کے رکن رحمان ملک کہتے ہیں کہ انہوں نے فیلڈ میں کام کرتے ہوئے گزشتہ 40 سالوں میں اس سے برا وقت کبھی نہیں دیکھا۔

انہوں نے کہا کہ ہمارے پاس پیمنٹ گارنٹیز کی وجہ سے کراچی پورٹ پر ہزاروں شپنگ کنٹینرز پھنسے ہیں اور ان میں سے زیادہ تر میں ضروری اشیاء جیسے ادویات، خام مال، تشخیصی آلات، کیمیکلز اور کھانے پینے کی اشیاء موجود ہیں۔

ان کا کہنا تھا کہ ”آپ اندازہ لگا سکتے ہیں کہ یہ سب ہماری مینوفیکچرنگ صنعتوں کو کس طرح نقصان پہنچا رہا ہوگا۔“

کسٹم ایسوسی ایشن کے چیئرمین مقبول ملک کا بھی کہنا ہے کہ ڈالر کی قلت کی وجہ سے ہزاروں کنٹینرز پھنسے ہوئے ہیں۔

تاہم، بحران کا تعلق برآمدی کارگوز سے ہے، کیونکہ پاکستان سے تمام بیرونی تجارت کنٹینر پر مبنی ہے، اور ملک سے کوئی مائع یا اناج برآمد نہیں ہوتا ہے۔

سرکاری ملکیت والی پاکستان نیشنل شپنگ کمپنی (PNSC) صرف اپنے 12 جہازوں کے ذریعے خام تیل اور دیگر پیٹرولیم فیول کی درآمد ہینڈل کرتی ہے۔

تجزیہ کاروں کا کہنا ہے کہ زرِ مبادلہ کے ذخائر صرف ایک ماہ کی درآمدات کے لیے کافی بچے ہیں۔

پاکستان کا سالانہ فریٹ بل تقریبا 5 بلین ڈالر ہے، اور غیر ملکی کمپنیاں بین الاقوامی کرنسیوں میں چارجز وصول کرتی ہیں خاص طور پر ”گرین بک“ یعنی ڈالر میں۔

شپنگ ایجنٹس نے نشاندہی کی ہے کہ موجودہ حالات کی وجہ سے جہاز رانی کا شعبہ پہلے ہی معاشی اتار چڑھاؤ کا شکار تھا اور اپنے جائز واجبات کی ادائیگی میں مزید تاخیر پاکستان کی بیرونی تجارت کو محدود کر دے گی۔

تاہم، اخبار سے بات کرتے ہوئے PSAA کے سابق چیئرمین محمد راجپر نے کہا کہ پاکستان ابھی تک معاشی بحران کے قریب نہیں ہے، اس لیے حکومت کے پاس اب بھی وقت ہے کہ وہ موجودہ بحران سے نکلنے کا راستہ تلاش کرے۔

راجپر نے کہا کہ، ”ہم مشکل وقت سے نکلنے کے لیے ہمیشہ اختراعی خیالات رکھ سکتے ہیں، ان میں سے ایک ڈالر کی ہیجنگ اور شپنگ کمپنیوں کو ادائیگیوں کے لیے قسطیں طے کرنا ہے۔“

پاکستان کے زرمبادلہ کے ذخائر حالیہ ہفتوں میں تیزی سے کم ہو کر 4 بلین ڈالر سے زیادہ ہو گئے تھے، جس سے خدشہ پیدا ہو گیا تھا کہ ملک ڈیفالٹ ہو سکتا ہے اور اسٹیٹ بینک غیر ملکی ادائیگیوں پر سخت کنٹرول لاگو کرنے پر مجبور ہوگیا تھا۔

دریں اثنا، پیٹرولیم ڈویژن نے مرکزی بینک کو خبردار کیا ہے کہ پیٹرولیم مصنوعات کا ذخیرہ ختم ہوسکتا ہے کیونکہ بینک درآمدات کے لیے لیٹر آف کریڈٹ (ایل سی) کھولنے اور تصدیق کرنے سے انکار کر رہے ہیں۔

پاکستان

Foreign shipping lines

PSAA

Remitting Freight Charges

Comments are closed on this story.

تبصرے

تبولا

Taboola ads will show in this div