لاہور میں گردوں کی پیوندکاری کا ایک اور کیس سامنے آگیا، ستوکتلہ پولیس نے انسانی گردے فروخت کرنے والے گینگ کے3 ملزمان کو گرفتار کر لیا۔

گرفتار ملزمان کی شناخت رضا مسیح ، لیاقت اور ذوالفقار کے نام سے ہوئی ہے، جوغریب لوگوں کو پیسوں کا لالچ دے کر گردہ لیتے تھے۔

پولیس کا کہنا ہے کہ ملزمان لوگوں کو ڈاکٹر عادل نامی شخص کے حوالے کرکے ایک گردے کےعوض متاثرہ شخص کو 2 لاکھ روپے دیتے تھے۔

پولیس نے کہا کہ متاثرہ شخص اکرم کو گردے نکال کررقم کی ادائیگی نہیں کی گئی، جس نے پولیس سے رابطہ کرکے ملزمان کو گرفتار کروادیا۔

ایس پی صدر سدرہ خان نے کہا کہ ایک گردہ 25 سے 50 لاکھ میں بیچا جاتا، ڈاکٹر براہ راست ڈونر سے رابطہ نہیں کرتا۔

انہوں نے کہا کہ گروہ نوکری دینے کے لیے میڈیکل ٹیسٹ کا کہہ کر گردہ نکال لیتے تھے، ملزمان کا ٹارگٹ غریب اور بھٹہ مزدور ہیں۔