اینٹی کرپشن خیبرپختونخوا نے مانسہرہ میں کارروائی کرتے ہوئے ریونیو افسروں اور اہلکاروں کی ملی بھگت سے مختلف افراد کو منتقل کی گئی ایک ارب 38 کروڑ 50 لاکھ روپے مالیت کی 2529 کنال سرکاری اراضی واگزار کرا لی ہے۔

ترجمان اینٹی کرپشن کے مطابق یہ کارروائی مانسہرہ میں سرکاری اراضی پر قبضے کے حوالے سے موصول ہونے والی ایک شکایت پر کی گئی۔ مشیر اینٹی کرپشن مصدق عباسی نے شکایت کا نوٹس لیتے ہوئے اسپیشل انویسٹی گیشن ونگ کو فوری انکوائری کی ہدایت کی تھی۔

انکوائری میں انکشاف ہوا کہ صوبائی حکومت کی ہزاروں کنال قیمتی اراضی کو ریونیو افسران اور اہلکاروں کی ملی بھگت سے غیرقانونی طور پر مختلف افراد کے نام منتقل کیا جا رہا تھا۔ ترجمان کے مطابق، اینٹی کرپشن کی بروقت مداخلت سے اراضی کی منتقلی کا عمل روک دیا گیا اور 2529 کنال 8 مرلے زمین صوبائی حکومت کے نام واپس منتقل کر دی گئی۔

خیبر پختونخوا میں 40 ارب روپے سے زائد کی مالی بدعنوانی کا انکشاف

ترجمان کا کہنا تھا کہ مزید ذمہ داران کے خلاف تحقیقات جاری ہیں اور اس معاملے میں ملوث عناصر کے خلاف سخت قانونی کارروائی عمل میں لائی جائے گی۔